有報道指，蘋果正計劃加強 Apple Watch 健康監測功能，同時會研發專業級運動版本，試圖挑戰Garmin、Polar 等專業運動手錶。
加入體溫及血糖監測
日前《彭博》Bloomberg 引述消息人士，話新一代 Apple Watch 除咗升級顯示螢幕、運算速度外，亦提升健康監測功能，更有指會於最新型號安裝體溫感測器，符合現今全球疫情下嘅需要。此外，據報 Apple 亦計劃加入血糖檢測儀，令追蹤健康功能更為全面。
不過，報道並無提及呢啲健康監測係點樣運作。特別係檢測血糖方面，現時最有效方式就係抽血或滴血，但手錶上檢驗血糖，又點可以唔刺穿皮膚而達到檢測效果呢? 有人就質疑佢哋嘅準確度。
消息指，體溫探測有望於今年或明年推出，但血糖監測仍需改良研發。
----- 廣告 Ad -----
專業級運動功能
《彭博》消息亦指出，蘋果已著手研發稱為 “explorer” 或 “adventure” 專業級運動型手錶。其實隨著新一代更薄嘅顯示器邊框、全新壓層技術，以及最快嘅傳輸技術，Apple Watch 功能可大幅提升。所以蘋果希望加強專業及運動功能，推出類似 Garmin、Polar 等品牌嘅運動手錶，有望2022年面世。
不過，現今 Garmin 同 Polar 等頂級手錶，有用無用嘅功能已經花多眼亂，除咗可應對跑步、行山、游水、踩單車等活動外，甚至有埋休息、飲水、瞓覺等功能，而電池技術亦好成熟，十日八日唔叉電都無問題。Apple Watch 是否可以憑藉品牌優勢喺運動手錶市場分一杯羮，大家要繼續留意。
資料: 《彭博》Bloomberg
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。