筆者自7月初開始反覆測試 Suunto9，決定在 Fitz 這平台上分享一吓，因為依度多山友，公諸同好~
老實講，依隻錶功能上可以話係世界級嘅，神級越野跑手 Kilian 都係戴佢就知卡士上已經唔駛講嘢，屬於專業級款式，咁我地依啲業餘玩山嘅，究竟啱唔啱用呢
香港本地6月首先就有菁英跑手 Jacky leung 同埋 Sam Tam 戴緊，佢哋依啲菁英跑手先可以將手錶功能發揮到極致，佢哋已經提及過好多關於依隻錶嘅用法，就好似人肉說明書一樣，但好多初階或進階跑者都未必明哂，就好似小學五年級生入咗港大聽教授講嘢一樣，擘大個口得個窿，淨係知内容好勁，但一時三刻消化唔到…
既然大部份人都同我一樣屬於小學生程度，就等我依位同學仔分享吓我依一個月同依隻錶嘅經歷!
試錶大會
7月初，筆者就去咗傳媒試錶日，由 Jacky Leung 帶隊，港大出發經西高山，以山頂廣場為終點，當日陣容鼎盛，我地接過手錶，大會人員已經為我地隻錶叉足電，我就好辛苦揀咗好耐先揀到黑色 (其實得兩隻色)，因為白色真係靚啲，但我又真係怕整污糟….
响隻錶度簡單入咗啲年齡身高體重例牌資料，裝埋個 apps 簡單對應就攪掂，港大起點 Jacky 教我哋企定定攞 GPS，嘩一㩒個掣就攞到咁滯，我心諗會唔會快得滯…反而有啲唔慣，平時攞 GPS 仲可以企定定左手一伸 chok 吓樣擺吓 pose…
行咗無耐，到一條幾斜吓嘅斜路，Jacky 停低咗，擰轉頭陰陰咀笑話教我地用手錶玩hill repeats, 係依隻錶眾多訓練模式之中其中一種，我地跟 Jacky 所講，set 咗跑距離是400米，然後隻錶就會自動響，跟住 set 咗90秒之後又會響，然後就開始重新計算跑400米的距離…我哋依班小學生，就係咁樣硬爆上斜400米，隻錶一響，就折返慢 jog 落返斜，夠90秒又爆返上斜，重複三次，沿途我見屍駭遍野，死嘅死傷嘅傷~ 依啲就係菁英跑手玩錶嘅方法…
重整旗鼓後，一行人就往西高山進發，我就不停留意吓隻錶嘅版面顯示，例如跑咗幾多K、自己心率變化、配速、攀升高度及現處海拔高度等等，我就周圍八卦吓人地隻錶，發現距離及攀升偏差極少，甚至乎可以話係接近無偏差…
終於去到終點山頂廣場，Jacky 教我地上載資料去個 apps 度，即刻睇返剛才嘅數據，包括路線、心率、攀升及配速等等，可謂應有盡有，非常仔細，啲數據細微到嚇親我咁滯。
最大優點係電量
依日之後，我就日日戴住隻錶，我一星期都至少跑四日，連瞓覺都戴住（除咗叉電果時），慢慢發覺其實每日叉電依個動作有啲多餘，可能以前經驗嚟講，心率錶一返到屋企叉電就係指定動作，叉少一晚第二日無電真係後果自負….依隻錶嘅電量耐用性，可以話係巿面上冧把温，我依家平均五日先叉一次，長課之後唔叉電都唔赦，我隻錶從未見過電量顯示少於40%….
準繩度超班
除咗電量係我最驚嘆之外，佢嘅 GPS 量度距離準繩度亦係首屈一指，我做過多番測試，運動場衝圈死霸住條内線一步不蝕，每一個圈到終點線果步就係400米，真係寫個服字。
電量夠、GPS 量度距離精準之外，對於我地依啲普通山賽友嚟講，氣壓計量度攀升都係非常緊要，一隻無氣壓計或者氣壓計造得唔好嘅錶，往往在量度距離上會出現重大偏差，十零K可有1、2K誤差，長途山賽重則有4、5K誤差 (不過電量好多已捱不完100K)，以前成日同朋友操練時爭論，「無可能，今日條路線明明20K攀升980米!」「你唔準囉，我隻錶18K半攀升1100米」…..
總評
經過筆者個多月來測試，老實講，功能之多筆者亦未能用盡，就好似林寶堅尼一樣，你唔會否定依部車嘅能力，你會諗自己手車究竟揸唔揸得掂，同等道理，依隻錶已經唔係在意响能力方面，擺明就係堅嘢，而只係大家價錢方面嘅取捨 (心果句)，我這類普通跑手 (又叫做有啲要求嘅)，簡單普通功能算係用得掂，相信大家唔會差得過筆者好多，正價6千多啲，折咗都好似4到尾咁滯，但筆者覺得仍然係值嘅，如果嫌貴，大可以用返現時果隻成日呷無電、心率突然跳到過200、GPS 路線飛到落海嘅錶….如果係真正想玩山，而且玩得有紋有路，而又報咗100K嘅，你值得擁有。
Fitz 連結: https://fitz.hk/?p=101077
更多:
Fitz Facebook專頁
[試玩報告] ONE PIECE Summer Park
[越野跑鞋] 實測 Brooks Caldera2
[搶閘先試Brooks] 最新緩震技術鞋款 Levitate
[跑鞋實試] Hoka OneOne Tracer2
[越野跑訓練鞋] 實測 Salomon Sense Pro Max
[越野跑鞋] 評測 Hoka Speedgoat 2
官塘朝偉@Fitz
Fitz Running 跑步
