圖: 跑Tee共享
「香港超級馬拉松慈善賽」繞哥爾夫球場跑6小時、12小時和24小時，從直升機望下來是無聊頂透的倉鼠行為。黃健裕 (跑Tee共享創辦人) 花了五年時間，為六大馬拉松部署、操練、儲錢、安排假期，在4月22日完成倫馬後，終於完成六大馬，有獎金咩?
「香港四大山徑超級挑戰賽」黃浩輝一口氣跑了298K，是香港代表中唯一四徑生還者，辛苦到嘔。去年曾燕紅老師用了七年時間，辭去教職，花了超過一百萬元，險些死去兩次，登上一個八千米的世界最高山峰，那裡冇7仔，上唔到 FB 去唔到 IG 打唔到咭呃唔到 like，連印花都冇得「吸」。
佢地有錢搵咩? 冇；有冇贊助？估冇，就算有唔慌多；駛唔駛花好多時間操練? 多到你唔信；會唔會有傷患? 你話呢。咁為乜嚟做?
曾燕虹(from海拔8848.44米上的課堂facebook)
或許還一個心願、或許應一個承諾、或許俾人挑機、或許我就是鍾意、或許同條命拗氣、或許你理得我…..。有好多好多原因，anyway，別只讓工作填滿你的生命!
----- 廣告 Ad -----
如果人生是一次 fine dinning 的話，對年青人來說，工作當然是個 main course，在黃金檔期 work hard，打併一個鐘的回報率，絕對高於五、六十歲的60分鐘。而家唔博，難道等到花兒也謝了?
Whatsapp 吹水、去十字星石狗牙打咭、打爆英雄聯盟，都是頭盤甜品。不過若 fine dinning 只有main course 而沒有頭盤甜品，一個字，寡，兩個字，霉友! 是生命的霉友!
左: 黃健裕 (鳴謝 凌凌發 借用圖片)
搵樣野動起來
當事業進入穩定期，即六成工作你不用驚動大腦便完成。工作的含量應該降低，準時放工不是一宗罪，顧不了方丈黑面。放假的時候，避免 hand carry 工作回家，做點有意義的、喪好玩的、任性的、體能的、藝術的、吹水的、贖罪的、幾型仔的……，總之 ABW – Anything But Work。
友人在網上查到香港約有130座山高於三百米，於是計劃走遍這些山峰，用了兩個行山季節，他跑了110個，還欠二十個，今季會竣工。這計劃對保衛地球和兩韓統一沒有什麼貢獻，但友人說 I come I see I conquer，型到震! 去完成一項任務，對他來說 mean something，絕對 add color 和十分治療！
----- 廣告 Ad -----
筆者去年試玩長跑，參加跑班，也參加比賽(當然是有分齡的才參加)，沒有上過大台攞獎(最威果次得第四)，但看見自己1K的 pacing 由6分到5分到4分尾，屢創PB (因起跑線太低)，成就大過買到子華飛! 記得當跑完人生第一個10K時，感覺同上凸台唔會差太遠! (上個月渡過生日，令我跳入另一年齡組別，在一項路跑賽事初嘗勝滋味，獲發年齡紅利!)
黃浩輝
當你忙到一點…..
- 錯過目擊阿B第一次識得自己走路
- 中學同學約行狗牙嶺你竟然唔能夠應約
- 世界杯決賽周你唔知幾時揭幕
- 同隊友夾唔到時間操毅行
- 「權力遊戲」第七季睇完第一集冇時間再追
- 阿仔約你買波鞋你都推掉
當工作忙到令你錯過了以上重要的人生片段，你的人生還剩下多少價值? 你不是白忙，是蝕忙!
生命之曲
去年記得有一個黃昏，在辦公室正埋頭工作 (認，係有上FB)，偶爾望出窗外，飄著絲絲細雨，陽光從雲隙中綻射出來，駭然發現天上掛著一條雙彩虹，各位觀眾，是完整的雙彩虹，唔係 double rainbow 雪糕，灣灣的七色，橫跨維港的上空，一端輕倚筆架山頂。那種震撼，使人睜大了眼睛，不懂言語 (但仍然記得影相 post 在所有人類已知的社交平台) !
當找到手機時，另一條彩虹已消失了
我問自己：世界那麼大，鹹田那麼美 (1/5長假前)，蚺蛇那麼尖，為什麼我還困在這個豆室扮公?
「生命，生命這好傢伙
何時我也說它不錯
燃亮我…..
是它是它給我天空和浮雲
還讓我去印下腳印
讓我聽宇宙聲韻……」
(林子祥 生命之曲)
陳國強
任性的quota
人一生被編碼了許多事情，讀書 (最好入江U)、工作 (最好政府工)、結婚 (最好係女神男神)、生B (最好入國際學校)，到要供飬父母 (暫時唔好入牛X劍X老人院)、考順子女(最好有層樓俾佢揸手！)……。你能力唔係好大，但唔知點解責任要咁大！
----- 廣告 Ad -----
但幾忙都好，留番幾個任性的quota，趁退休之前，行使了配額。要求唔高，唔駛你擘炮唔撈去南非做backpacker (畢竟有幾個人等你開飯)。試下請日假，半夜出發，戴住頭燈 (OK cool)，去鳳凰山頂影幅日出配個雲海 (嗱，講下啫，呢兩樣嘢極少同場演出，有其中一樣已可找數)，post 在IG。又或者定個計劃，今年要完成個30K以上的山徑 (50K是筆者今年的目標，可追找數)。
冇獎架，但型囉!
Fitz 文章連結: https://fitz.hk/?p=93545
更多：
Fitz Facebook專頁
[XTE春季越野挑戰賽]「阻人前進」與「超前扒頭」的潛規則
[Translantau 25K入門版] 低端男遇好人好事
[UTMB西貢計分賽] 不平凡的Check Point
孫立民@Fitz
Fitz Running 跑步
