踏入7月，大陸各地受到熱浪侵襲，民眾都要諗辦法消暑。平常最鍾意街頭、公園打牌、捉棋、吹水嘅四川人，酷熱天氣之下唔可以進行呢啲咁傷腦筋嘅活動。有商人就睇準商機，開設上圖呢啲「浸腳加打牌」嘅「上水活動」。
廿年前仲屬於四川省嘅重慶，甚至將呢啲「水上麻雀館」，設計成「水上活動中心」。顧客可以喺水上捉棋打牌，甚至可以嘆茶。
有用家向記者表示，佢屋企雖然有冷氣，不過去公園唞涼係一項重要社交活動，所以佢每星期都會去一兩次，每次玩幾個鐘。
有人於河溪打麻雀
----- 廣告 Ad -----
醫生: 長期浸腳有礙健康
大熱天時浸住對腳當然舒服，不過有醫生警告呢啲「水上活動」存有健康隱患:
- 從相片可見，「浸腳池」裏面有客人嘅腳，仲有麻雀枱椅，池內衛生環境難以控制，細菌容易經池散播。
- 腳板滿佈微絲血管及神經線，腳部浸於水中當然可以降溫，但浸腳太耐會令血管收縮，影響血液循環。
