陳伯介紹 兩條「鳩行」Youtuber Channel，好睇就好睇，不過筆者嫌未夠「鳩」。講到「鳩行」，筆者首推 Cedric社職仔 嘅頻道。
「Cedric社職仔」由幾名14歲嘅小朋友主理，內容廣泛，有真人版喜劇、整蠱環節、開箱文，甚至魔術教學。而最廣為人知，係佢哋喺武漢肺炎停課期間，幾條「行路」短片。
天水圍行路去柴灣
「社職仔」響朶之作，係停課期間拍嘅「徒步由天水圍行路去柴灣」，點擊率有310,000次。
14個鐘行42公里，更要行山路，對呢幾位細路都算係大挑戰。不過，短片之中，令人感受到佢哋對世界嘅好奇，對前路充滿希望。而呢種感覺，我哋呢班大人真係好耐無感受過。
----- 廣告 Ad -----
話佢哋「鳩行」，絕對唔係貶意。「鳩」者，漫無目的也，即係唔使講咩大道理，由心出發。正如「Cedric社職仔」自我介紹話:「總之係自己鍾意嘅咪得囉，每天做着自己鍾意嘅嘢，過得好一點，咁就最好啦」。
佢哋並唔會同你講路線規劃，又唔會介紹咩徒步裝備，可以話係為行而行，但令人睇得開心，更會為佢哋打氣。除咗天水圍行去柴灣，佢哋仲試過海怡半島行去上水、上水行去尖沙咀等。
呢班細路證明咗，正能量唔係掛喺口邊嘅廢話，落手落腳一樣得。
朱溫
生於亂世，有種責任。這個責任就是做好自己，感染別人。鍛練好身體，才能裝備自己，迎接亂世。
