常言道: 狗係人類嘅朋友，所以會陪主人四圍去玩；貓就係人類嘅主子，只會留喺屋企等待主人奉獻。不過，呢個情況隨時改變，因為越來越人會帶住隻貓遊山玩水。
美國《USA Today》專題報道，貓星人投入戶外活動嘅現象，已經成為社交媒體備受關注嘅話題，Instagram 嘅 #adventurecats，已經有超過340,000個帖。貓貓除咗陪主人去遠足、露營、攀岩，仲會滑雪甚至滑浪。
《USA Today》就介紹幾隻相當出色嘅貓星人。
怕水貓去滑浪
來自夏威夷嘅 Hokule’a 唔似一般嘅貓貓會怕水，佢直頭好鍾意水，最鍾意滑浪。
----- 廣告 Ad -----
走入背囊等上山
西雅圖嘅 Moose 好鍾意行山，不過因為天氣太凍，好多時佢都係背上主人背囊。而佢見到主人著行山靴，就會自己跳入背囊等出發。
鍾情野外的 Leon
愛達荷州嘅 Leon 同主人東征西討，露營遠足樣樣啱。有時佢爛玩到，會自己去拎條貓帶畀主人，叫主人帶佢出街。
----- 廣告 Ad -----
入水能游出水能遊
夏威夷嘅 Suki 好鍾意同主人划艇，有時甚至跳落海游水。佢主人為咗迎合佢好動性格，會帶佢周遊列國進行戶外活動，一共去過13個國家。
專家: 唔好夾硬嚟
動物專家就提醒大家，唔好為咗打卡呃 like 逼隻貓做啲佢唔鍾意嘅嘢。專家話，每隻貓嘅性格都有唔同，有啲好動、有啲內向，佢唔鍾意出街就唔好逼佢去街。此外，專家就話帶貓進行戶外活動，要注意呢幾點:
- 用貓帶: 以防貓走失，或者喺戶外地方發生意外
- 戶外地方有唔同氣味，或聲音，可能會令貓貓不安，要留意佢哋嘅狀態
- 貓貓唔鍾意嘅嘢，唔好逼佢
資料: USA Today
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。