10種最令人討厭的露營行為

同露營友吹水，有人講咗句:「如果營地擠逼，去露營其實即係同三九唔識七嘅陌生人同居，一個唔覺意有人無公德心，就真係有排你受。」講得好。

有時遇到啲唔生性嘅人同一個營地，就真係情願返屋企訓。

因為咁，我試下整理10種令人討厭嘅露營行為:

1. 精力旺盛嘅大聲公

由夜晚至清晨都可以口不停，講嘢仲係大大聲，佢哋唔知營幕係唔會隔聲，你拉埋個營，喺入面大聲講嘢，都會傳到老遠。

2. 當電筒係激光劍

一到夜晚拎支電筒亂咁照，無論有無照到人哋隻眼，都已經好滋擾。特別係有人諗住睇星，你用強光亂射，即係製造光害。

3. 垃圾蟲

污水唔倒入污水洞，廚餘唔包好直接倒落洗手盆，甚至走嘅時候將垃圾通地揼……

4. 偷窺狂

鍾意「裝」人哋個營，就算人哋拉埋，都會嘗試喺窗口裝。

5. 露體狂

喺沙灘露營你著泳衣大家無嘢好講。不過去到山頭露營，除晒上衫做乜？就慘係，有人見營地得男人，以為無人介意，竟然著條底褲行嚟行去……

6. 釘子戶

紥完個營，仲要霸埋枱櫈行人通道；甚至朝早搭好個營，然後走咗去夜晚先返。

7. 文雀

偷嘢食、偷水用都算，就慘係趁你行開，偷走你支營柱、營釘，人哋嗰晚點訓呢？

8. 低頭族

難得喺郊外露營，可唔可以睇少陣電話，上少陣Facebook呢？

9. 怪力亂神 

人類對於黑媽媽嘅地方，唔多唔少有恐懼。衰在大家亦好鍾意尋求刺激，要喺深夜時份講下鬼故、怪事。講還講，唔該行遠啲講，你嘅話題嚇親人就無謂啦。

10. 洗衣/碗工場

水喉大排長龍，但仍霸住條喉洗衫洗碗。點解唔用水袋裝水返去洗？

大家仲有無補充? 有啲話不如留個言丫。

Fitz連結: https://fitz.hk/?p=108814