睇足球小將長大嘅香港人，都明白呢套漫畫。
係唔係標準漫畫迷都會識得衝力射球。由戴志偉喺街上盤球返屋企，講出一句「足球是我嘅好朋友」，暗示我會好好控住個波，唔會俾佢跌出馬路俾車碌爆開始，志偉就不斷將敵人變成朋友兼隊友，由林源三、小志強、由小學鬥到中學，世青、世界盃再對辛坦拿，到之後誇張到失咗控，你都要 follow 落去，因為佢地對世界盃有種幻想，幻想有一日兌現志偉同師傅勞比度叔叔嘅約定，喺世界盃決賽同巴西決一死戰。足球小將最好睇係將足球變成籃球咁玩法，每一場關鍵嘅賽事都有令人期待最後必入嘅絕殺球，而點樣絕殺法就係絕招嘅終極版本。
一國國民能夠實踐一個國家夢想固然荒謬，但一個漫畫故事能夠真實發生的話更加係荒天下之大謬 (所以暫時未得)。以前無咁多直播球賽，無咁多資訊，支撐70、80後呢班人去追睇世界盃除咗因爲場場直播之外，仲因爲相隔四年嘅空檔中，有一本漫畫不斷講隔離國家點樣追求足球嘅夢想。九十年代日本自組聯賽，培育本地球員，去到世界盃就算成為魚腩部隊 (當年煲到三浦知良幾勁幾勁都係入一球都難)，但佢地從來無放棄。足球小將話俾我地知，我地由少年變中坑，佢地嘅夢想都無改變，一班四散到不同地方鬥到你死我活嘅年青球員，返到祖國就上下一心去為國家爭取，而且最重要佢塑造咗我足球嘅世界觀，贏幾多次聯賽錦標都好，都唔夠贏一次世界盃光榮，世界盃就係每一個足球員嘅終極夢想。足球小將對夢想追求嗰種執著係足以吸引從來都唔踢波嘅我。
喺C朗同美斯準備退出國家隊之際，對我嚟講，足球界入面永遠最響噹噹嘅名字永遠都係大空翼 (戴志偉)。佢永遠不死、永遠不老，永遠不言退，對足球嘅追求永遠都咁 PURE。記得上年年頭去日本旅行嘅時候，有一個屬於足球小將嘅足球場，仲有佢勝出球賽嘅「真足球」，佢嘅成長係「真實」架。
講番場波，好多人都會話日本隊都唔夠人高，最後一分鐘做乜要斬個角球俾人反擊成功，點解唔短角球 hea 到入加時賽，搏踢十二碼晉級，點解? 連教練事後仲話無諗過唔夠十秒完場就輸多球。但我想 WIND 帶睇返前一分鐘: 本田圭佑離門四十碼 (遠過迪馬尼亞嗰球)，仍然嘗試一腳射入龍門，好明顯佢都係睇戴志偉大，佢射出一記遠距離「衝力射球」，而呢一球對所有足球小將嘅粉絲先至係最經典嘅一球，因為佢模仿緊戴志偉喺最後一刻施展嘅必殺球。夢幻歸夢幻，現實歸現實，射唔入就唔入，返歸就返歸，但呢個足球當籃球嘅玩嘅精神，亦都喺最後一個角球度堅持咗，因為限時內「爭取勝利」就係最高嘅體育精神，雖然係好笨，但亦都係最 PURE。
足球小將嘅故事由近年失哂控，到今屆現實版戲劇性嘅落敗係好可惜，但戴志偉嗰份精神，不論晉唔晉到級，同場館入面嗰張最大型戴志偉 banner 一樣，都喺球迷嘅心入面。
或者日本隊世界末日之前都拎唔到世界盃，但戴志偉嘅鬥志喺我有生之年都會繼續鼓勵我。呢套戲悲劇收場都一樣壯觀，因為一個國家講夢想講咗三十年，依然不放棄繼續追求。
Fitz 連結: https://fitz.hk/?p=98346
Fitz Facebook專頁
[八十前後老廢青] 到伊朗訓練「恐怖分子」不留宿的沙發客體驗
[別讓佛系填滿你的生命] 三個登上珠峰的港人
[跑場新聞] 西城秀樹帶給跑友的啟示
人稱Law少，前電台主持及監製，酷愛體育運動，多次參加馬拉松及毅行者活
動，近年更嘗試進軍三鐵及渡海泳。對於跑步、對於行山、對於比賽，均有深刻而令人動容的看法。著有《原來在沒有盼望 的地方才需要盼望》。
