印度中部一條村莊，有班馬騮同流浪狗爆發「幫派戰爭」，更波及村民。
英國《衛報》轉述當地媒體報道，指印度中部 Maharashtra 邦一條農村，三個月前因一隻年幼馬騮被流浪狗圍攻咬死，之後山上就開始有馬騮聚集，並展開「復仇行動」入村擊殺附近狗隻。村民話，有馬騮將狗仔捉上屋頂，有啲狗仔由屋頂掉落地撻死，有啲狗仔被困屋頂活生生餓死。有村民數過，約莫有250隻狗被殺死。
馬騮入到村後，除咗追殺流浪狗，部份亦襲擊村入面嘅小朋友，唔少村民被困屋企，關好門窗唔敢出街。
當地林業部門近日已展開行動，官員話已經捉咗兩隻最兇猛嘅馬騮，將佢哋放入深山。暫時未知行動係咪成功，馬騮會唔會返入村搞事。
----- 廣告 Ad -----
冤有頭債有主，馬騮有復仇意識，唔知野豬會唔會一樣記仇呢?
資料: 英國《衛報》、New York Post
永誠
講求綠色、環保、天然的健康生活。推廣新一代健康生活文化。