----- 廣告 Ad -----
![](https://i0.wp.com/fitz.hk/wp-content/uploads/2022/01/黃蜂-1.jpg?resize=1024%2C885&ssl=1)
黃蜂巢
WeeeeeeeeWeeeeeee 係喺露營時,經常聽到嘅聲音之一。蜂,亦係喺户外相當容易遇上嘅昆蟲之一,同時係一種非常容易令女人花容失色嘅昆蟲之一,嚴重起上黎,聽到蜂聲都已經狂奔緊!不過恐懼大多數都因未知,所以今次老hike 分享下蜂類嘅特性。
喺了解蜂類之前,要先了解以下兩大類: 蜜蜂、黃蜂
蜜蜂 honey bee
----- 廣告 Ad -----
特徵身短腰粗,採食花粉及花蜜,並儲起黎做蜂蜜。會利用尾部毒針攻擊人,但因為毒針有倒勾,所以當要離開人體時,毒針個勾會勾住人體嘅皮膚,就需要連同部分內臟一齊扯走先可以離開,導致蜜蜂會即時死亡,亦因為咁,蜜蜂好少會主動攻擊人。
黃蜂 hornet
又名胡蜂、虎頭蜂,特徵身長腰幼。屬雜食性,除咗會採食花蜜外,仲會捕捉其他細小昆蟲,並將其他昆蟲咬成肉團後帶返去俾黃蜂幼蟲食。同蜜蜂唔同,尾部毒針無倒勾嘅關係,所以可以重複使用,亦因為咁比較高攻擊性。
通常大家都會將以上兩種都叫蜜蜂,但其實因為種種原因,一般户外好少會見到野生蜜蜂,就算見到,都好少會接近人類,所以大多數見到都係黃蜂黎,而其中黃腰虎頭蜂、雙色虎頭蜂最為常見。
不同崗位的黃蜂
----- 廣告 Ad -----
正所謂知己知彼百戰不殆,要防範黃蜂,先要了解黃蜂特性,黃蜂同人一樣,係分開崗位返工的,大致分四類:
採集蜂
負責出去搵食,通常會出現喺花圃、垃圾堆、果園等地方,搵到食之後會直飛返蜂巢,所以通常唔會離開蜂巢太遠。大多唔會攻擊人,甚至會避開人,但如果返緊蜂巢期間受騷擾就會轉為攻擊模式。
守衛蜂
負責留守蜂巢出入口,觀察會唔會敵襲同分辨返黎嘅採集蜂係咪自己人。一發現有敵襲,就會召集攻擊蜂保護蜂巢。
巡邏蜂
負責出去巡邏,當蜂巢受到騷擾時,就會放巡邏蜂出去望下,一發覺有敵人,就會轉為攻擊模式。
攻擊蜂
除咗採集蜂同巡邏蜂會變攻擊蜂外,當蜂巢受到危險襲擊或破壞時,就會飛出大量攻擊蜂,而同時仲會利用費洛蒙召喚其他蜂加入攻擊行列。
當了解黃蜂嘅工種之後,就知道見到一隻時,大多為採集蜂,唔攪佢就無事。小量一組就係巡邏鋒,代表蜂巢就喺附近,要小心了。一群時係攻擊蜂,千奇唔好行過去,盡快離開!但如果真係遇到黃蜂時又可以點做呢?
應對
當飛近身邊時
如果只有一兩隻而飛埋身邊,佢哋好大機會係採集蜂,可能係為咗搜集食物或者體味、香水等吸引到,通常飛幾個圈見到無野食就會飛走,千奇唔好拍打,因為佢哋係識吹雞的,只要唔理佢哋就自然會飛走。
喺頭部盤旋時
多為巡邏蜂,因為黃蜂對黑色、飄逸嘅頭髮會認為係敵人,所以成日都會喺頭盤旋,當發現咁嘅現象,建議要保持冷靜同唔好亂郁,等一陣佢自然會飛走。反而狂跑或攻擊佢哋,會令佢哋召喚其他攻擊蜂過嚟,所以唔好郁係最佳方法。
如果過咗一陣,黃蜂無走仲要越嚟越多,代表附近有蜂巢仲要啱啱被騷擾過,依個時候就要迅速而唔大動作地向黃蜂群反方向離開,如果有鮮色外套就除落黎包頭保護自己。
當成為攻擊目標時,只有一個方法 – 跑。最緊要同同伴分散跑,分散風險。仲要跑向上風位,利用風流令黃蜂對體味產生混亂,同時要小心仆親。
----- 廣告 Ad -----
真係不幸被螫到,都唔需要過分緊張,因為蜂毒主要係令人皮膚劇痛、腫脹發炎,並非致命。就算十幾隻蜂毒加埋,都不足以令人死。但唔好因為咁就唔驚,因為某特殊體質嘅人對蜂毒會產生過敏反應,反應輕時,皮膚會腫脹、癢、痛,嚴重時可能出現全身性症狀,如蕁麻疹、呼吸困難、暈眩,甚至過敏性休克。
![](https://i0.wp.com/fitz.hk/wp-content/uploads/2022/01/蜜蜂-2.jpg?resize=1220%2C686&ssl=1)
網上流傳有人被蜜蜂叮後3小時迅間變潤腸
如果只係中一兩針,可以自己檢查傷口,留意有無毒針殘留,有就用針挑返出嚟,再用急救包內嘅類固醇藥膏貼喺傷口。而黃蜂毒係屬鹼性,所以可以用酸性如食用醋中和傷口減輕痛楚,但蜜蜂毒係屬酸性,要用鹼性如番梘、洗手液中和。但如果出現過敏反應或太多針,就必須盡快去醫院求醫!
不論黃蜂、蜜蜂都好,其實都只係為咗生存、搵食而去保護自己,只要唔好侵犯佢哋,佢哋都唔會主動攻擊人,其實蜂都幾可愛。