日前有警員喺市區被野豬襲擊受傷，漁護署隨後宣佈新措施，話會定期於市區主動捕捉野豬，之後「人道毁滅」。
幾個動物保護權益嘅組織隨即表示反對，並發起簽名運動，只係幾日已收到超過40,000個簽名，公眾反應相當熱烈。大家對呢項政策咁不滿，其實有呢幾個原因。
野豬政策5年大改變
漁護署於2017年，改變實施咗幾十年嘅狩獵野豬做法，暫停安排野豬狩獵隊行動，並於同年推行「捕捉／搬遷先導計劃」，將滋擾市民嘅野豬捕獲，再放回偏遠郊野。與此同時，亦會為野豬避孕，希望維持數量。今年年中，漁護署分析野豬數量，估計全港郊野有1,800至3,300隻野豬。
----- 廣告 Ad -----
圖: 漁護署
漁護署由暫停狩獵野豬、為野豬避孕，突然態度180度改變，要將野豬「人道毁滅」，難免令人覺得同受傷警員有一定關係。
政策改變未必一定係壞事，不過喺實施新措施前，應該要先諮詢市民，廣納民意，令市民有所適從。
漁護署為野豬避孕 圖: 政府新聞署
野豬係危險生物?
唔少接觸過野豬嘅市民都覺得，野豬性情溫純，只要同佢保持隔離，野豬根本唔理人，甚至會主動走開。漁護署於2019年指野豬襲擊人類有上升趨勢，近3年有平均每年10宗傷人個案。
同野豬相比，郊野馬騮對人類滋擾更大。主動問人攞食物外，亦會破壞財物。金山郊野公園幾個停車場，就經常有馬騮聚集，有的更會破壞停泊車場嘅車輛，「熟架步」車主根本唔會泊低部車。
所以，政府呢次話要將野豬獵殺，就令人覺得係雙重標準。
----- 廣告 Ad -----
新政策缺法理支持
喺政府推行「人道毁滅」野豬嘅同時，野豬仍列入本港嘅「受保護動物」名單 之下。漁護署網頁，仍然係咁介紹野豬:
「野豬是本港常見的野生動物，廣泛分布在香港的山林。在一般情況下，野豬習慣避開人類，但在覓食時偶爾會在鄰近郊野的公共地方附近出沒。」
新政策似乎違反有關名單。
係「漁護署」定係「愚護署」?
漁護署全稱為「漁農自然護理署」，使命就係護理自然，保護生態環境。其中一個重要議題，就應該係教育市民點樣同野生動物共存。而家漁護署要將野豬趕盡殺絕，有人嘲諷「漁護署」做「愚護署」，佢哋要保護嘅，究竟係咩人呢?
連日來都有幾篇好出色文章，值得大家細讀:
