每年4至6月，大陸全國都舉行「初中學業水平考試」，簡稱「中考」，初中考生為入讀心儀高中，都希望考好成績搶高分。學生要坐定定考筆試外，亦要接受體能測試。有不法商人就睇準家長「臨急抱佛腳」嘅心理，推出「中考體測鞋」。
呢啲所謂「中考體測鞋」，宣傳口號極為浮誇:
- 迅速提高立定跳遠10-20厘米，男子1000米、女子800米迅速提高20-40秒
- 一雙能讓所有項目拿滿分的跑鞋
「中考體測鞋」標榜「專為中考而設」、「提高成績立竿見影」，喺人買我又買之下，唔少家長考試前夕都忍唔住買番對，希望子女考到好成績。
鞋底多幾粒釘賣貴啲
山東有家長，就因為擔心囝囝體育科表現稍差影響總成績，就買咗對「中考體測鞋」。
呢名家長話，佢買咗對價值399人民幣嘅款式，商家話運動鞋「抓地力強、重量輕、透氣性好」，可提升考生成績。不過家長拎到實物後，發覺「體測鞋」同普通運動鞋分別唔大，只係鞋底用上較大嘅橡膠鞋釘。而經家長多次試驗後，發現囝囝成績不升反跌，立定跳遠近咗幾厘米，仲話穿上之後步履不穩。家長就覺得被騙，打算著返平常嘅運動鞋去考試。
----- 廣告 Ad -----
大陸媒體發現，呢啲「中考體測鞋」近日成為網店嘅熱門貨品，售價由百幾至近千不等，當中有一款168人民幣，更售出超過一萬對。不過，記者亦發現網站嘅留言，大多數呢啲「中考體測鞋」留下負評，似乎有唔少人中伏。
有專家話，呢啲鞋立亂喺鞋底加釘加防滑，會影響本身結構，對發育中嘅初中生影響深遠。
其實終極問題，就係做運動要循序漸進，家長唔想努力就想走捷徑有好成績，係本末倒置教壞細路。
合肥市中考體測標準 按圖放大
----- 廣告 Ad -----
