藝人黃翠如飲山水感染腸病毒，網民顯微鏡驗出細菌籲勿用洗手

藝人黃翠如話，早前佢去到敍利亞同馬來西亞拍攝旅遊節目，誤信當地人指「飲山水會比較健康」，於是煲都無煲過就直接飲用山水，結果返香港後身體不適，被診斷出感染腸病毒，醫咗成個月先好返。

「山水未煲過唔應該飲用」係常識，就算河川溪澗無受到人類破壞，山上嘅動物、昆蟲都會令河水污染，除非經過濾及煮滾，否則直接飲用山水係搵命搏。台灣亦有長年居於深山嘅原住民，長期飲用山間溪水染上阿米巴變形蟲，導致肝衰竭差啲無命。

山水洗手都唔好搏

早排喺連登討論區，有熱愛行山嘅網民就收集本地山間溪水，再以顯微鏡觀察山水嘅狀況，發現水中有大量細菌，包括阿米巴變形蟲 (Amoeba)、草履蟲 (Paramecium) 及棘尾蟲 (Stylonychia)，仲有好多不明生物。

值得留意嘅係阿米巴變形蟲 (Amoeba) 最為可怕，本港衛生防護中心指出，阿米變形蟲會引致「棘變形蟲角膜炎」，可導致患者永久視力受損或失明，須施行角膜移植先可回復視力。

而呢位網民亦補充，佢因為器材所限，好多惡菌病毒都應該「走漏眼」，所以呼籲大眾，未經處理嘅山水，千祈唔好飲，連洗下手都唔好制。