[Law少 許耀斌] 我和無法做運動的成成 去坐電動輪椅

----- 廣告 Ad -----

輪椅界今年的其中一單網聞，就係輪椅使用者落巴士後『神蹟』站立，引發網民恥笑及質疑佢呃傷殘交通津貼，但如果你身邊有一位好似『成成』范成榮的朋友仔你就會明白，唔一定要一步都行唔到先坐輪椅，就好似唔一定係大肚或白頭髮先需要關愛座，M到都好可以痛到面青口唇白，都一樣係唔坐唔得。

喺人生路上，佢有時都係會神蹟般站起來，睇片:

成成就係要『動起來』，所以先要坐電動輪椅，間唔時衝出天水圍。佢患有先天性心臟病，喺未知個死字點寫已經出死入生幾次，由兩歲開始做咗不下十次手術，玩到今年22歲，我呢篇文就係作為佢遲來嘅生日賀禮。佢都打過籃球，到今日出半日街都要吸氧氣，隻腳真係字面咁解係腫過豬蹄，行步路都擺擺吓。

九把刀話:「人生就係一場戰鬥」，對成成嚟講：每一日都係戰鬥。可能發燒唔退就會入院，話就話等換心，但有幾多個心俾你換?

我問成成，先天性心臟病一般幾多歲命你有無了解過?

佢話:『無呀，人人都一樣，今日唔知聽日事。』

你今日有手有腳真係要好好珍惜做運動嗰種大呼大吸，因為一口氣一條命。

佢走唔得遠，但要去更遠，佢喺雷霆881《大玩派》有個『成機對話』嘅環節，講一個長期病患嘅年輕人點樣勇敢生存。雖然無得返學返工，但佢對生活充滿熱情，佢坐住輪椅，聞住氧氣都要睇黃子華；佢唔坐得飛機都想排除萬難返越南家鄉 (佢喺難民營長大)；佢想做 YOUTUBER，就去搵電動輪椅公司去尋找合作機會，呢種傳媒人 MINDSET 好多人一世都學唔到。

成成 Facebook: 范成榮 Phan Thanh Vinh 光之旅

就係因為無機會先要搵機會，就係因為無可能先要搞到有可能。

聽位同事介紹電動輪椅，有時遇上車禍嘅年輕人，一世人都唔可以再行得返，希望一部車可以幫到佢。我試過陪成成坐電動輪椅去人頭湧湧嘅書展，我唔係坐喺度嗰個都感受到所有人都會望吓我地。係行動不便壓力大啲，定人一個加一個嘅目光壓力大啲? 簡單如坐地鐵，我地要等到落車嗰個站，有職員 READY 先可以上車，而且其他人係唔會俾你上先，仲要一齊踩個踏板上。

我唔係想講香港人質素問題，我係想講一個輪椅使用者係要有無比勇氣同耐性先可以出街，結果五點幾離開會展，成成搞到九點先返到屋企。唔用輪椅，的士接送來回$500一個鐘，但個輪椅就係廢咗無用，用輪椅就花多三倍時間，呢個就係住天水圍輪椅使用者嘅生活。

$500 VS 5小時

現實係香港地，有手有腳都生活得唔好，行動不便嘅更加要自生自滅啦，明白嘅。約翰福音都有個類似故事：在耶路撒冷，靠近羊門有一個池子，希伯來話叫做畢士大，旁邊有五個廊子，裡面躺著瞎眼的、瘸腿的、血氣枯乾的許多病人。在那裡有一個人，病了38年。 耶穌看見他躺著，知道他病了許久，就問他說:「你要痊癒嗎?」病人回答說:「先生，水動的時候，沒有人把我放在池子裡，我正去的時候，就有別人比我先下去。」耶穌對他說:「起來，拿你的褥子走吧!」 那人立刻痊癒，就拿起褥子來走了。

就算有個康復池，都唔到大病嘅人去，好似急症室咁，一大班傷風感冒嘅人已經衝哂落去，同內地D泳池咁人疊人，水泡撞水泡嘅畫面係一樣。

好似呻咗好多，但都不及睇成成玩電動輪椅咁爽啦

有人話:「心動不如行動」，計我話行動都不及心動。

因為有人，走不動也要向前。

NO REGRETs
NO RETREATs
NO RESERVEs

范成榮 Phan Thanh Vinh 光之旅 Facebook 專頁

Law少 許耀斌 Facebook 專頁

Fitz 連結: https://fitz.hk/?p=100852