香港秘密搜查官．維港44米水底下「不明生物」係乜?

ViuTV新節目《香港秘密搜查官》啟播，第一集節目以探索「維多利亞港最深水域」為主題。「搜查官」發現維港最深水嘅地方，就係筲箕灣與鯉魚門對出海域，水深達44米。

水底影像

攝製隊土法製作嘅「亞特蘭提斯人」拍攝系統深潛至水底，雖然嗰到水質甚差，觀眾乜都睇唔到，但係「亞特蘭提斯人」上返岸後，發現打撈到一堆「不明水底生物」，Mike導叫「異形」，暉暉叫「The Thing」。

節目去到呢度完，無搜查呢啲係咩生物。根據網上大批網民分析，其中一個講法，話呢啲係海星嘅近親，叫做「陽遂足」。

陽遂足 (brittle star)，又稱為蛇尾，係十分常見嘅海洋無脊椎生物。因為外型呈現五角星形，所以經常有人以為佢係海星。不過佢嘅腕足無海星咁粗壯，腕足吸盤亦無海星咁發達，所以只要細心留意，陽遂足同海星有明顯分別。

陽遂足屬群居生物，喜生長於陰暗嘅水域或石隙之中，分佈於全球海域，由近岸地方以至水深600米深海都有發現。