12.19 選舉日，政府定為免費乘車日
政府將12月19日 (星期日) 定為「免費乘車日」，市民可全日免費搭乘陸上公共交通工具，包括巴士、地鐵、輕鐵、電車。撞正星期日假期，搭車唔使錢就梗係有咁遠去咁遠，郊遊活動在所難免，不過呢次「免費乘車日」大家要注意以下五點，以免耽誤行程。
免費乘車日注意事項
1. 不包小輪、小巴
呢次只限部份陸上公共交通工具，公共渡海小輪，無論係去尖沙咀中環，定係去長洲、南丫島，都一樣要畀錢。小巴，無論係綠頂定紅頂，亦都係要畀錢。
小巴無份 圖: 香港巴士大典- Fandom
----- 廣告 Ad -----
2. 新大嶼山巴士
嶼南線只有由梅窩出發嘅1號、2號同4號喺當日免費。以下呢幾條行經嶼南道嘅路線係要畀錢:
-
- 11號: 東涌 <> 大澳
- 21號: 大澳 <> 昂坪
- 23號: 東涌 <> 昂坪
此外，新大嶼山巴士來回各中國口岸嘅「B」線，亦要畀錢。
3. 九巴、新巴、城巴
機場巴士「A」及「NA」線、來往各口岸「B」線、觀光巴士「H」線、通宵巴士「N」線、長途巴士新型服務「P」線，亦 不是 「免費乘車日」範圍內。
入西貢嘅94號同96R當日係免費。 圖: 巴士大典
4. 點樣搭車?
根據各間公司消息，大家當日要咁樣上車:
- 港鐵: 唔使拍卡，閘機全開
- 九巴、龍運巴士:「上車後不用繳付車資」。公司未講使唔使拍卡，大家到時留意車長指示
- 城巴、新巴: 用八達通拍卡 (車資顯示為$0)，無八達通就要同車長講，車長要mark數
- 新大嶼山巴士: 要拍八達通
5. 免費嘅嘢會係最貴?
各間公司以城巴同新巴網站最貼心，佢哋嘅公告有一項值得大家留意:
「由於乘客的出行習慣或會改變，本公司建議市民，特別是乘搭前往休閒熱點路線的乘客，預留充裕時間乘車，及避免於繁忙時間出門。」
----- 廣告 Ad -----
古語有云「免費嘅嘢先係最貴」，當日人人去逼巴士、地鐵，各項公共交通係咪有能力應付? 其實好令人懷疑。搭免費車嘅背後，隨時就要你付出更多時間，得到更差嘅搭乘體驗，咁會唔會得不償失呢?
更何況，有報道指呢次嘅花費係由各間公司支出。羊毛出自羊身上，巴士公司、港鐵公司咁大企業，相信會諗到方法去填補呢次損失。
無論有無免費搭車日，行山季節呢條新巴9號線一樣排長龍。
資料: 各間公共交通公司網頁、政府新聞網
朱溫
生於亂世，有種責任。這個責任就是做好自己，感染別人。鍛練好身體，才能裝備自己，迎接亂世。