奈良公園嘅鹿相當受旅客歡迎

3月2日，日本警方拘捕一名男子，控告佢殺死一隻奈良鹿。

案情透露，23歲建築工人吉井勇人，於2月7日午夜到奈良公園散步，期間同一隻鹿玩耍，不過呢隻鹿突然撞佢部車。吉井一怒之下，用斧頭攻擊鹿嘅頭部，吉井逃離現場。幾日後，有人發現鹿仔屍體，警方翻查 CCTV，將疑兇吉井拘捕，控告違反「文化財產保護法」。

襲擊奈良鹿嘅事件要數到十一年前，當年有人用弓箭射死一隻奈良鹿。

日本男子斧頭斬死奈良鹿 案情3大疑點

唔少香港人去到關西，都要去探下奈良鹿。呢啲通常喺奈良公園出沒嘅鹿，被定為「天然紀念物」，受法律保護，日本國民都好珍而重之。呢次襲擊事件，好多日本人都好不忿，受公眾廣泛關注。東京スポーツ Tokyo Sports 更以專題探討案情，發現疑點重重。

1. 鹿好少主動攻擊

動物專家話鹿係好溫馴嘅動物，甚至懼怕人類，所以佢哋好少會主動攻擊。近年雖然多咗鹿向人攻擊嘅事件，但專家話鹿主動撞向汽車嘅機會都係好微，除非有人向鹿做啲好唔尋常嘅行為。

2. 傷痕同口供不符

警方話死亡嘅鹿有5.4厘米深傷痕，深入腦部，屬致死原因。不過呢種傷痕同斧頭造成嘅傷痕應該好唔同。疑兇話佢用斧頭將鹿斬傷，似乎同事實不符。

3. 夜媽媽拎把斧頭同鹿玩?

最令人奇怪就係，疑兇吉井午夜時份喺奈良公園同鹿仔玩，但點解要拎住把斧頭? (佢話一怒之下隨手用斧頭攻擊鹿仔) 有傳媒思疑，吉井可能當時濫藥，致使有奇怪行為。

無論點都好，殺害野生動物都係冷血行為。希望日本警方早日將兇徒繩之於法。

https://www.youtube.com/watch?v=pprF_1zMOHE

資料: NHK、東京スポーツ