[澳洲山火] 旅遊計劃應該擱置嗎?

澳洲災難性山火破壞環境，生靈塗炭，只要有血性的地球人都對呢場災害心痛不已。不過，隨住農曆新年逼近，唔少人已經計劃好假期嘅旅程，而澳洲亦係香港人嘅熱門選擇。

咁喺呢一場影響咁大嘅山火之下，澳洲係咪仲成為旅遊目的地呢? 直到1月初，香港政府仲未有任何指引，我哋香港人唯有自己諗掂佢啦。英國《獨立報》就以英國人立場討論呢個問題，亦相當有參考價值。

情況有幾壞?

單係睇新聞，大家都知道有幾多億隻動物死咗，有幾多人失踪，不過如果計劃咗去澳洲，大家要留意更多更深入嘅情況:

1. 暫時嘅重災區在新南威爾士省 (NSW)，該省早前更宣佈全省進入緊急狀態
2. 全澳洲逾140個火頭，60處仍未受控。主要旅遊省份昆士蘭，暫時仍然安全
3. 澳洲西部雖未受山火影響，不過因山火而破壞道路，西部多處地區成為孤島
4. 除咗留意火勢，仲要留意空氣質素。首都坎培拉嘅空氣極差，而空氣污染亦影響塔斯曼尼亞，甚至新西蘭

上個月悉尼受到空氣污染影響

人哋救援邊有心情玩?

要決定係咪取消行程，除咗要睇災害嘅影響外，更多人考慮當地嘅氣氛。當打開電視只係報道災區情況，四周空氣彌漫火場氣息，其實都唔會有咩心情去吃買玩。

所以《獨立報》建議大家，如果未落實旅程，咁就去其他地方玩，無必要打擾人哋救災。

取消行程難獲賠償

現時澳洲航班大致正常，香港及澳洲亦沒有發出旅遊警示，已預訂機票酒店嘅朋友，想取消行程基本上難以得到賠償。

至於如果參加行山等戶外活動，而因山火要影響行程的話，如果呢個係香港報名嘅旅行團，就受旅遊業協會所保障；如果係自行向澳洲當地旅行社報名嘅話，咁就唔受保障嘞。

至於散買機票或酒店，就要睇返自己預訂嘅機票或酒店條規。此外，如果透過保險公司買咗旅遊保險，亦可以同保險代理查詢情況。

早前 Ultra-Trail Australia 大會亦在 Facebook 專頁發文，勉勵大家共渡難關，惟暫時仍未知道5月舉行的賽事會否受到影響，有意參加的跑手請加倍留意。