大埔碗窰棄龜成災，放生變殺生

清明節前後，再有動物保護團體發現於大埔碗窰山澗發現大批棄龜。香港棄龜關注組日前於上址救出約40隻棄龜，令關注組嘅工作不勝負荷。

發現嘅烏龜品種屬巴西紅耳龜，喺一般嘅水族館可以買到。雖然呢種烏龜較為「粗生」，不過咁多烏龜被棄置在一個細小區域，糧食同生活地方嚴重不足，亦對原生動植物有極大傷害。

而且，倖存烏龜亦罹患各種疾病：爛甲，腸炎，肺炎，有啲甚至性命垂危。部份烏龜嘅龜殼更被人寫上紅字，漆油有機會令烏龜患病。而烏龜因為生活環境擠逼，引發佢哋互相攻擊，部份烏龜因此而死去，剩番個空殼，情況相當可怕。

放生外來物種引發生態災難

台灣嘅放生習俗比香港更普遍，台灣政府於十多年前已關注問題。當地官員發現，放生動物通常會大量死亡，而外來物種因為放生而進入當地生態圈，會直接威脅原生物種，甚至滅絕當地獨特生物嘅獨有基因。台灣獨有雀鳥烏頭翁，就係因為與外來嘅白頭翁雜交，而令烏頭翁喪失其原始基因。

大埔碗窰發現嘅紅耳龜，絕對唔屬於香港原有動物，佢哋喺天然溪澗生活所帶來嘅影響，暫未有詳細研究，但若果生態遭到破壞，要回復本來面貌相信絕不容易。

台灣原生雀鳥烏頭翁

----- 廣告 Ad -----

放生變殺生，祈福變折福

近年台灣政府多年前嘅報告指出，「放生」已變成一門生意，對信眾以至公眾造成一定損害:

• 不法商人為供應放生信眾動物，以非法手段濫捕野鳥、海龜等野生動物，加速野生動物的滅絕
• 「放生」後嘅動物，離開原來的生長環境，常因適應不良而死亡
• 放生會影響自然生態，為害當地原有物種
• 不法商人將放生嘅野生動物捉回，再度售予別人「放生」，致形成重複傷害與欺瞞行為

有宗教人士提醒信徒，如果希望積善積福，唔一定要放生，可從日常生活著手，例如搶救野外受傷或瀕臨絕種嘅野生動物，以及身體力行，教導大眾停止非法獵捕及販賣行為等。

香港棄龜關注組

香港棄龜關注組 關注本地棄龜問題，佢哋為棄龜尋找主人，教導公眾棄養動物等問題，令社會大眾重視生態環境，以及動物權益。

據了解，呢次大埔碗窰棄龜，令關注組嘅工作百上加斤。佢哋呼籲公眾積極參與其義務工作，以紓緩關注組壓力。此外，關注組亦會定期舉辦開放日，為棄龜尋找主人。

資料: 東網、台灣環境資訊中心