「中國共產黨第二十次全國代表大會」於10月中勝利召開，當時唔少人寄望領導開完會後，中國防疫政策會有新取向。基於呢個原因，各省各市早於9月宣佈舉行長跑活動，而11月6日更成為「超級周末」，一日之內全國有近10場比賽舉行。
無錫馬拉松已著手佈置，奈何結果仍要延期
不過，「二十大」結束後各地爆發疫情，根據百度以及野村證券 (Nomura) 的統計資料，全國有28個城市正在實施不同程度嘅封鎖措施，高風險地區有2265處，受影響民眾達2億人。
喺防疫政策不變、疫情升溫之下，賽事唯有暫停。當中最受注目就係最先宣佈如期舉行嘅江蘇無錫馬拉松。有關方面話:
「鑑於當前省內外新冠肺炎防控形勢的嚴峻性，為防範疫情擴散風險，切實保障廣大跑友、工作人員和市民的健康安全，經組委會慎重研究決定，原定於2022年11月6日舉辦的2022無錫馬拉松延期至2023年舉辦，具體舉辦時間另行通知。」
----- 廣告 Ad -----
除咗無錫，山西太原、安徽潛山、江西九江，以及山東省嘅濰坊、青島、日照等賽事，加上上海10公里賽亦宣佈延期或取消。至於最具標誌性嘅北京馬拉松，暫時仍未知會否於11月6日如期舉行。
香港渣打馬拉松、樂施毅行者已定於明年2月展開，唔知到時又咩環境呢?
