漁護署早前試行實名預約營地，市民可透過網上系統預訂「荃錦營地」營位，反應非常熱烈。對於實名預約制度，市民各有睇法，有的認為設計不錯，有的就寧願去其他營地繼續霸位，當然還有不少朋友選擇去私人場地。正所謂「咸魚青菜，各有所愛」，最緊要都係有套制度去跟，否則好似湖北呢位女子咁，露個營都要不停被村民騷擾，就真係非常麻煩。
據傳媒報道，中國湖南有袁姓女子網上發文，指早前去到長沙露營熱點興馬洲露營，因為人太多就喺較邊緣地方落腳，點知一攞裝備出嚟，就有村民趕到收取「過夜費」，每人20元人民幣。當時女子未搞清楚情況，決定就俾錢了事，點知去到夜晚，又有村民過嚟收取「帳篷費」，攞個爐出嚟煮食，又要收取「煮食費」，統統都被女子拒絕。
到隔日早上，同一名村民又嚟到，話見到搭咗天幕，要收「天幕佔地費」，女子忍無可忍同村民爭論，最終村民敗走，去到下晝村民仲帶埋老婆嚟「發爛渣」，話「今次就算了，不收你天幕費用，平時都要收點費用的」。
去露營就係想靜下休息下，俾呢班村民搞真係咩心情都無晒，最諷刺嘅係，女子發現原來該處唔係私人土地，當地村委會負責人亦公開澄清:「村民自發收費沒有任何依據，如有旅客遇到類似情況，可保留證據向村委會進行投訴」。咁即係同搶有咩分別?
永誠
講求綠色、環保、天然的健康生活。推廣新一代健康生活文化。