《禁藥謊言》劇照
《禁藥謊言》劇照

講述前單車之神岩士唐食禁藥拎7次環法賽嘅電影《禁藥謊言》,月底喺香港公映 (遲台灣成半年)。電影內容、卡士、賣點,我哋Fitz.hk早前亦講過,大家可以參考返岩士唐的禁藥人生 電影《The Program》《是誰在造神》單車梟雄岩士唐的十年興衰

不過,岩士唐食禁藥,都叫做係佢一個人嘅事。而最近,體壇就爆出勁料,就係俄羅斯嘅禁藥醜聞,涉及範圍甚廣,包括夏季同冬季奧運會,背後仲有成個國家包庇!

呢單嘢,由一位俄羅斯800米跑手講起,佢叫Yuliya Rusanova。

俄羅斯的 禁藥謊言 1
Yuliya Rusanova

Yuliya係俄羅斯頂尖跑手,800米pb係1.56.99。不過,天意弄人,佢竟然認識咗一位俄羅斯反禁藥中心嘅低級職員Vitaliy Stepanov,兩個人一見鍾情,閃電結婚。

老公嘅工作雖然低級,不過仍然有政府官員出5%年薪嘅報酬,要求佢更換有問題嘅血液樣本。縱使佢啲同事大多數人都有收錢,但佢仍不為所動,因為佢相信:

“I want sports to be fair. If somebody wins, I want him or her to be a real hero, not a fake one.” (我覺得體育運動要公平。邊個贏都好,佢應該係真英雄,唔係假冒囉。)

俄羅斯的 禁藥謊言 2
老公Vitaliy Stepanov

咁佢就前前後後寫咗200封email同50封信畀國際反禁藥組織WADA,不過WADA一直話佢哋無能為力。而佢亦受到俄羅斯FSB (即係美國FBI)嘅壓力,叫佢唔好咁多事。

到2013年,老婆Yuliya因為嚴重受傷,失去國家嘅保護,就被人揭發有服藥嘅歷史。於是佢兩公婆,出走俄羅斯,並公開爆出呢宗醜聞。

醜聞爆出之後,有關方面正式展開調查,包括2014年索契冬奧,以及2008年北京奧運俄羅斯田徑隊。甚至有人估計俄羅斯會被逼缺席今年奧運田徑賽事。

呢兩公婆嘅訪問,大家可以睇返CBS嘅《60 minutes》

值得一提嘅係,佢兩公婆而家係喺加拿大尋求政治庇護。老婆Yuliya未有國藉,希望可用「無國藉人士」嘅名義參加今年巴西奧運,以支持反對禁藥。

主要資料:CBS News

更多:
Fitz.hk Facebook 專頁
《是誰在造神》岩士唐的冠軍之路
《是誰在造神》單車梟雄岩士唐的十年興衰
岩士唐的禁藥人生 電影《The Program》