[東京奧運2020] 疫苗可拯救奧運?

日本染疫個案近日由高位輕微向下，情況雖見穩定，但唔少人仍對奧運如期舉行不甚樂觀。

• 1月中，《倫敦時報》引述一名無透露姓名嘅奧委會高級委員，指日本政府反對疫情期間舉行奧運，國際奧委會否認
• 日本NHK最新一項民意調查指，77％被訪者希望奧運可再次推遲或完全取消，只有16％贊成如期舉行

打針唔打針都有爭議

去年11月，英國成為全球首個國家接種疫苗，奧委會主席 Thomas Bach 隨即表示，希望疫苗有助奧運順利舉行。其後，奧委會提出要公平分配疫苗，所以唔鼓勵運動員有接種優先權。由於指示不甚明確，各國做法都有差別:

1. 澳洲: 將於7月前為全數奧運選手接種疫苗
2. 匈牙利: 會為運動員優先接種
3. 塞爾維亞: 會為運動員優先接種
4. 加拿大: 政府未有安排，但有加拿大運動員表示，就算有優先權都唔會打尖

加拿大運動員呢個態度，亦反映唔少人睇法。首先，疫苗於去年底面世，效用仍未被完全證實。其次，有人認為運動員並非疫情下之「高危群組」，喺疫苗供不應求下，優先接種亦即剝奪高危人士機會。最後，強制奧運選手去日本前打疫苗，對部份未有經費大批購入疫苗嘅國家唔公平，違反奧運世界大同嘅理想。

加拿大奧運摔跤金牌得主 Erica Wiebe 明言: 「就算有疫苗可打，我都留畀醫院護理員同埋高危人士。」

Erica Wiebe

規模之大隔離泡泡難以實行

奧運規模之大，就算有嚴厲防疫措施，亦難以百分百保證參加人士嘅安全。2016年里約奧運，有來自200多個國家或地區，共11,000多名運動員，計埋教練及後勤等人員，人數比運動員多幾倍。亦即係話，就算呢次東京奧運將參加人數大幅縮減 (包括不設觀場觀眾)，估計仍超過二萬人齊集東京。

有人建議用NBA嘅「隔離泡泡」去控制疫情，不過NBA只涉及22支球隊，每支15名註冊球員，難以同奧運規模相比。

NBA採用隔離泡泡以控制疫情，連現場觀眾都虛擬化。

本周奧委會主席 Thomas Bach 重申，會堅決實踐今年舉行奧運會嘅承諾，而有關措施將於2月公佈。奧運到底成唔成事，就睇下佢哋有咩措施再講啦。

資料: CNN、路透社、ABC、CNA、奧委會官網