香港Spartan Kids Race被指安排混亂，主辦單位道歉圖息民憤

上周六 (5月29日) 海洋公園舉行嘅「香港斯巴達兒童賽2021」，賽事完結後唔少家長都蜂湧喺 Facebook 發帖及留言，投訴大會安排混亂。呢啲家長嘅指控，大概係咁:

• 起步及登記安排十分混亂，參加者需花大量時間排隊入場
• 選手包同完賽牌未能於賽事期間派發 。有小朋友比賽時無大會衫，完賽後又無獎牌，失去打卡最佳畫面。(工作人員聲稱相關紀念品被扣關，要在活動後寄予參加者)
• 障礙設計兒戲，難度甚低，有家長話「似足兒童遊樂場」，亦有家長話「連泥都無，邊到算係斯巴達?」
• 各個關卡等候時間甚長，失卻比賽意義，尾段更需要終止部份障礙
• 更改障礙無預早通知

賽事移師去海洋公園舉行，有家長嫌啲關卡太斯文

賽事紀念品於比賽日無得派發

當晚主辦大會「香港斯巴達」已透過社交平台向參加者及家長道歉，不過未能平息參加者怒氣。

到5月31日，斯巴達亞太區營運總監 Mike Goodwin 拍攝短片向公眾道歉，並提出新安排:

1. 再搞多次「香港斯巴達兒童賽」，5月29日嘅參加者可免費參加
2. 新一場「兒童賽」會選用傳統斯巴達比賽場地，多達15個障礙關卡
3. 紀念品會盡快郵寄至各選手

不過從留言睇，唔少家長都未滿意安排。有唔少人話，已經對大會失去信心，搞多場比賽都唔會參加，情願退番報名費。

睇嚟香港斯巴達要解決呢次公關災難，都唔係咁容易。

玩泥係斯巴達嘅重中之重，無得玩泥又算咩斯巴達?