「新界單車徑網絡」官方網頁啟用，三個環節有待改善

政府用咗超過10年、耗資超過5億興建，全長60公里嘅「新界單車徑網絡」，理論上可以由荃灣踩單車，經屯門到達上水粉嶺，最後抵達沙田馬鞍山。土木工程拓展署早前推出「新界單車徑網絡」官方網頁，介紹單車徑各段資訊。

三大資訊分門別類

網站將「新界單車徑網絡」分為6段，每段以三個方式介紹單車徑情況，包括: 文字資訊、短片，以及地圖。

地圖精心製作

官網地圖除有詳細路線，亦會介紹沿途景點及設施，包括泊位、休息處，以及往來公共交通。不過，有市民就反映設計雖然美，但仍有不足之處:

1. 官網有介紹單車徑途經景點，不過現實中，部份景點並唔歡迎單車。有屯門市民指，跟住官網踩單車入屯門公園 (打算去廁所)，公園門口保安連推單車進入都唔畀
2. 網頁上地圖，並不能下載路線，當然亦無得將地圖連至運動手錶。
3. 市民想跟住電子地圖一路踩單車，就要下載政府「香港出行易」手機應用程式，利用佢哋嘅導航地圖。不過一路踩車一路睇手機，如果單車無相關裝置，似乎有啲難度。有市民亦話，佢哋個實時地圖load得有啲慢。