Fitz > 運動 Sports > 單車 Cycling > 網上交收易中伏! 公路單車交收檢查列表! (超實用)

公路單車交收檢查列表有頭髮邊個想食咖哩,有錢邊個唔想買新嘢。但係單車嚟講,買一手比嘅錢,實質上有一半係畀咗代理用作宣傳同交租,實際性價比係奇低的。

所以我鼓勵大家環保同慳錢,買二手零件最划算。

香港二手單車零件市場非常活躍,當中有唔少好嘢,同好人,但亦有唔少人諗住從中獲利同純粹搵老襯,除此之外亦有唔少潛規則,所以我決定寫一篇文,去列出買公路車交收時需要留意嘅地方。

公路單車交收檢查列表_01

交收前:

  1. 先做功課!明白零件有無分Size,型號,行貨/水貨,年份,耐用程度,有無其他人用過有問題,同埋啱唔啱自己用,唔識就問你個朋友-Google。
  2. 當你發現一件你有興趣嘅零件時,先留言『有興趣』,然後先同賣家溝通聯絡。(留咗言唔代表件嘢係你嘅)
  3. 留意是否賊贓。
  4. 如果有FB, 睇下賣家帳號有無可疑,例如新建帳戶/無真名/頭像/無朋友等等,如果係就要Keep in mind, 中伏機會+20%。
  5. 可以的話留意下賣家係用家定炒家,同一件貨品可能佢平買貴賣。(實況:有師兄諗住益車友平放,點知俾佢搵嚟賺錢,抹殺咗真正用家嘅機會)(至於咁樣做啱定錯你自己釐定)
  6. 約交收,地點時間互相遷就,準時係家教,飛機判死刑。
  7. 出門口前,再一次同對方確定時間地點,確保對方證實無誤,先好出門口。

公路單車交收檢查列表_02

交收時:

  1. 準時!準時!準時!準時嘅意思係喺約好嘅時間在現場出現。唔係喺約定好嘅時間之後出現,或發訊息話嚟緊。
  2. 先諗好要檢查咩地方,為咗尊重對方,要認真檢查,唔好嘥對方時間。
  3. 以下我會列出交收公路車不同零件時候需要檢查嘅地方,文中沒有提及的,可以在下方留言,我會加入文中俾大家參考。
  • 鵝頸/龍頭/彎把:留意螺絲是否原裝,螺絲牙有冇磨蝕,鋁質有冇凹陷,碳纖維有冇裂痕
  • 前叉:碳纖維前叉用手觸摸及輕按所有表面,如果有下陷或有聲就係有裂痕,唔好買。留意叉頂位置長度,會唔會過短,鋸得太短未必啱你尺寸。留意叉內菊花有冇用錯鋁叉菊花(真係有機會發生的)。
  • 車架:
    • 碳纖維:觸摸及輕按全車身表面,如果有下陷或有聲就係有裂痕,唔好買。
    • 鋁車:檢查有否凹陷,刮花脫色。
    • 坐通鎖位置有冇因為鎖得太緊而出現裂痕
    • BB: 如果跟BB, 留意是否BB30, BB30有可能出現怪聲現象,諮詢一下。留意bb附近位置有沒有裂痕。如果不跟BB,留意內裡螺絲牙有否滑牙。
    • 尾叉,尾叉位置很多時會因為意外出現裂痕,要小心檢查。
    • 記得留意噴油和細節,檢查是否原裝貨,以防被淘寶翻版混淆。
  • 坐通:檢查有冇因為鎖得太緊而出現裂痕。檢查是否原裝貨。
  • 車件:
    • 槍手/變速器:肉眼觀察有否生鏽,轉波時靈敏度和數目。上鎖位置有否因為過緊而發生異樣,把膠套拉起觀察裡面情況。
    • 大餅:上面印上的齒比數目是否一致,牙齒有否脫落或磨損嚴重,曲柄上鎖蓋是否存在。腳踏上鎖位置螺絲牙有否滑牙。
    • 飛輪:輪片數目是否一致,上面印上的齒比數目是否一致,牙齒有否脫落或磨損嚴重。
    • 前後C夾:活動是否靈活,用力合起會否自然回彈。螺絲帽和戒指是否存在,制膠磨蝕情況評估,
    • BB: 上鎖位置螺絲牙有否滑牙。檢查順滑程度。
    • 波撥:檢查磨損程度。
    • 波腳:有否拗彎、變形。小輪牙齒有否脫落或磨損嚴重,轉動時是否順滑。螺絲是否齊全。
  • 腳踏:腳踏上鎖位置螺絲牙有否滑牙。轉動時是否順滑。螺絲是否齊全。
  • 胎:留意有冇耗損,露出纖維,老化,胎上好多時會有一個小孔,去量度耗損情況,如果小孔失或近乎消失,表示耗損嚴重。
  • 車鈴:
    • free hub 有否出現嚴重磨損,轉動時是否暢順。速度數目是否一致。
    • 鈴支有否變形或斷裂。
    • 肉眼觀察煞車位置磨損情況。有否入銀。
    • 拿著Hub的兩端(不要拿著快拆)轉動時看看車鈴有否拗和變形。轉動是否順暢。
  • 頭盔:盡可能請買新的。留意出廠日期,超過3年的通常不合格。
  • 全車:當你買全車,除咗以上嘅東西,最緊要係坐上去踩下,轉波感受一下,聽下有冇怪聲,有任何不能轉速或怪聲或破損情況,我都會選擇放棄。

公路單車交收檢查列表

交收後:

  1. 假若回家後不幸發現自己買咗件有問題物件,(姑勿論賣家是否搵老襯成功)通常賣家也不會願意負責任。
  2. 這時請緊記,當買了一個教訓,不要把它放回網上搵下個老襯,尊重人尊重自己,人哋做賊,唔代表你亦需要出賣自己,誠實係一個優良社會嘅基石。若果真係要賣,請先維修或清楚記明產品問題所在。記住,蝴蝶效應,下個人可能會因為受騙而跳樓。不過我相信香港人有基本道德概念嘅。

最後,好好享受滾動的樂趣吧!

更多:
高階單車路徑分享和注意事項: 大冷
杜光庭其他文章
Fitz單車文章


文章為作者意見,不代表Fitz立場。