第108屆環法單車賽日前展開，第一站距離終點45公里處，一名「熱情」女觀眾舉紙牌衝出跑道，紙牌令經過車手跌低，形成骨牌效應，大批選手通通炒車，令多支車隊失去寶貴時間外，共有21位車手受傷，當中更有1名選手因傷退賽。
炒車後，呢名女觀眾喺警察到達前離開。因為紙牌寫有德文，唔少人估計係德國人，有媒體更話佢已經坐飛機潛逃返德國。
事件發生5日後，呢位女觀眾終於落網，原來佢係法國人，今年30歳。被捕之後，原先估計會被控以「因過失造成他人受傷」罪名，面臨最高1500歐元罰款，以及受傷車手嘅民事索償。
環法大會撤消起訴
不過｛歐洲時間7月1日傍晚，環法主辦機構 ASO 向媒體透露，將唔會向警方提出控訴。賽事總監Christian Prudhomme 話:「其實單嘢只係大家煲大咗啫。」
----- 廣告 Ad -----
Christian 補充，環法傳統係鼓勵觀眾積極參與，只要觀眾唔係立亂過馬路，大家帶埋BB，帶埋寵物睇比賽都得。總監強調，觀眾如果尊重選手嘅話，無乜必要去限制佢哋嘅行為。
意外發生後，唔少選手對大會控制觀眾嘅措施都甚有微言，第四站更加有選手發起慢駛抗議，所以大會呢個決定，話唔定再次刺激選手激烈回應。
資料: 法新社、英國衛報、Cycling News
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。