[夫妻同心] 七天穿越阿爾卑斯山公路單車賽 TOUR Transalp 2017 (三)

Pieve Di Ledro

Stage 6 30/6/2017 Aprica to Pieve Di Ledro 約120公里

抖夠啦! 再玩過!

太陽伯伯依然好怕醜，落住雨粉，地下有D濕，得10度，選手都着返長袖衫，絕不掉以輕心。

由意大利 Aprica 小鎮出發，走過45公里的下坡路段（好刺激）上一個1900米的大山，共120公里。

途中經過小村莊，綠草如茵的大山頭，在山間的峡谷穿過，最後的10km又開始落雨，用了7.5小時安全到埗……湖區渡假勝地 Pieve Di Ledro。

(按圖放大)

天色轉晴…..出發。

穿過山谷便到目的地。

Stage 7 1/7/2017 Pieve Di Ledro to Arco 約102公里

戦 最終回

路似平坦，但上上落落3-4個小山，最斜的坡度也在這站出現，都甘甘哋，小D耐力都不能完走啊!

中途有車手發生嚴重意外，高速下坡時被寬闊的渠蓋卡前輪，搞到要由直升機送走。

踩到70-80公里路段時，舊雨雲都係唔放過我，凍到死咬緊牙關上埋嗰400米，又令我諗起上波牌時的訓練。

到頂啦，走出雨帶區，見到大湖Lake Garda—目的地，衝多15公里落山返終點，用了6.3小時完成。

完走了! 太陽終於出來了!

(按圖放大)

等待出發。

途中的補給站。

順利到達終點Arco。

來自新加坡和香港的亞洲隊伍。

----- 廣告 Ad -----

賽後感

可能你會問，點解要老遠去到德國參加個單車比賽?

我可以答你，參加比賽只係手段，遊走阿爾卑詩的單車路線才是目的。

兩年前自己計劃行程去了瑞士踩了一趟車，直到今日仍有阿爾卑詩山的小花花香，乳牛的牛鈴聲，雪山融雪的流水，連綿不絕的髮夾彎，在我腦海間徘徊。如果參加當地單車旅行團，團會因應參加者的能力，每日路線只有40-60公里，遊走的地方太小了，因為我份人比較貪心，唔會啱我。

我又想玩得潚灑D，唔帶行李玩，又會有補給站支援，呢種比賽形式的長途騎車就最切合我需要啦!
大會精心挑選不同的靚景路段，唔洗自己傷腦筋，沿路有路牌，有工作人員，甚至出動埋警力同消防員去封路，確保選手做路霸，而且唔會盪失路。

最重要嘅係路上安全，急救隊跟喺後面。畢竟單車係帶有危險的運動，我哋仲要返香港湊囡㗎!

雖然這次比賽有28個國家嘅人來參加這個比賽，但大部份都是來自歐洲的，而且是來自德國本土的，佢哋大部份人都唔識得講英文，但比我想像中友善，唔睬人係因為怕遇上溝通上的尷尬。而且我哋係小數的亞洲人，對我哋好奇之餘還也特別關心呢!

跟外國選手交流也是一個難得嘅體驗，我最欣賞係佢哋對單車運動的熱愛，目測所見，接近五份一的參賽者都是50歲以上的，女性如是，甚至60歲以上的男性也不少，滿面皺紋，相信年齡不是他們的界限，而且踩得比我還要強還要快和勁。

兩年前參加過一站業餘環瑞賽，也領略歐洲車手的強，出發前努力練習希望能完賽，不敢奢望任何奬牌，Just to enjoy the race! 就當玩七日毅行者吧!

爬上白雪覆蓋的 Passo Stelvio