上面呢架就係意大利名牌Bianchi (二手)，日本yahoo有人放648000日圓，成4萬7港幣。齋車架，新貨賣大概4999美金，差唔多4萬港幣。
買二手車，一般都知道要驗車，搵間車房睇下有無問題，然後至畀錢辦手續。不過，原來買二手單車都唔好疏忽，一個唔覺意買咗冒牌貨就因小失大！
事件係咁：
- 車友A喺網上，放售一個二手意大利名牌車架Bianchi Oltre XR2，索價 $13990。
- 買家B見咁抵，即時以呢個價錢購入。畀錢之後，感覺唔係好妥，於是拎畀代理核實真假。
- 單車代理發現呢個賣萬四蚊嘅所謂意大利車架，其實係老翻！ (根據淘寶搜尋，新嘅只值三四千蚊).
- 呢個時候買家B同單車代理當然都搵唔返賣家A啦，結果代理東主將部假車嘅相放上自己fb，同時間網上群組有人聲討事件，花生友即使群起狂插賣家車友A，一地花生。豈料(據講)車友A喺單車界稍有名聲，於是引發另一幫勢力護主，甚至有人私訊聲討人士，希望花生友滅聲唔好搞事(情節咁熟既)！
- 車友A同買家B私下達成協議賠償，車友B決定不予追究。
- 事情迂迴，被告變受害人! 據講連賣家A原來都唔知車是假的…… 佢亦係從另一名賣家L手上換回來。花生價格再上漲。好嘞，咁究竟賣家L係邊個呢？
- 起底組出動了! 搵出行騙源頭賣家L身份，仲據講係警察…… (以上一切只係覆述網上事件，當中有幾多成真相，請自行判斷。)
綜合咁多年《警訊》對市民嘅提醒，大家可以留意返：
- 便宜莫貪：賣得太平嘅嘢要小心。好似話日本Yahoo呢個Bianchi Oltre XR2有人賣648000日圓，即係4萬7港幣。而家賣13990真係平得緊要。
- 搵專家：萬幾蚊咁大數目，搵人Check下先畀錢完全唔過份。最緊要，就係搵你信得過嘅人Check，唔係由賣家提供囉。
- 盡可能拎多啲賣家資料。靠電郵、Facebook，甚至電話都唔太穩陣。不妨問佢拎卡片，甚至抄佢身份證。(怕觸犯私穩問題，咁剩係抄佢真名囉。)
淘寶嘅Bianchi，最貴3萬5，最平3千3。正如馬雲話，淘寶嘢一定抵過正貨。(#曲線要講明)
----- 廣告 Ad -----
資料來源：香港二手單車零件群組
更多：
Fitz.hk Facebook 專頁
[開心大發現] 可能係全港最最最短嘅單車徑
[正苦新猷] 灣仔至北角的「推車徑」
Fitz Cycling 單車
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。