住喺日本長野縣，就讀高校3年級嘅小山大登 (こやま たいと)，係動漫《Love Live!》(港譯《明星學生妹》) 嘅忠實fans。以前佢每日只係匿喺屋企睇動漫打機，討厭做運動。不過佢為咗要去「學生妹」所在嘅靜岡縣學校，計劃踩單車200公里展開朝聖之旅，竟然令佢成為單車選手。
《Love Live!》故事講一班女學生為咗拯救校園，決心成為演藝偶像。
早前疫情爆發，小山唔可以跨縣旅行，要將朝聖之旅押後。不過，佢仍堅持每日上山操車，應付日後嘅旅程。小山每日練足10個鐘，一如動畫《颷速宅男》嘅小野田，雖然缺乏正規訓練但又練成一身好武功。最後，小山仲被當地單車名校賞識，邀請佢參加縣內賽事。
----- 廣告 Ad -----
經歷多次同校長拖拖拉拉之後，小山喺比賽前五日答應參賽，仲喺比賽裏面一鳴驚人，成為縣內冠軍。佢仲以呢個身份代表長野縣參加全國賽，最後雖然排名第15，不過已經成為當地名人，仲有電視節目介紹佢嘅事跡。
資料: kiragamiteru.com
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。
