[正苦新猷] 灣仔至北角的「推車徑」

政府想像中嘅灣仔海濱公園

政府喺6月公佈一份叫「灣仔北及北角海濱城市設計大綱圖」，政府計劃會由灣仔至北角嘅海岸，興建各類休閒活動設施，其中包括單車徑！

即係話，大家可以由灣仔，沿住海邊踩單車，一路踩到北角…… 咪住先！

點解嗰份「大綱圖」裏面，有一條紫色虛線，仲係講明係「須下車行走」？ (下圖紅圈圖示)

(按圖放大)

1. 分域碼頭 (假設起點) > 金紫荊廣場 (踩車600米)
2. 金紫荊廣場 > 舊灣仔碼頭 (行路500米)
3. 舊灣仔碼頭 > 灣仔運動場 (踩車500米)
4. 灣仔運動場 > 怡東酒店 (行路 850米)
5. 怡東酒店 > 天后 (踩車850米)

即係話，由分域碼頭到銅鑼灣消防局，短短3.3公里，你要上車落車3次。踩車嘅距離一共1950米，行路嘅距離都有1350米。雖然唔算行路多過踩車，但差唔多一半路都要行，你話係咪好無癮呢？

最麻煩就係，原本大家都可以運用道路使用者守則，將單車踩出馬路。不過如果起好呢一段單車徑，就要踩返去單車徑。至於嗰幾段「須下車行走」嘅「推車徑」，又算唔係單車徑呢？

一日政府唔將單車視為代步交通工具，一日只係會當佢哋係小朋友嘅三輪車，只係畀大家喺公園踩下咁囉。

有團體每年都爭取港島北單車徑，而家計劃呢個方案，睇怕無人會收貨。

資料來源：政府新聞網、張超雄Facebook

更多：
Fitz.hk Facebook 專頁
[單車節2016] 踩入3橋3隧
[英國標準] 私車家、單車 請保持1米距離
屯門至馬鞍山 2020年踩單車直達
Fitz Cycling 單車