[香港首條跨灣單車徑大橋] 將軍澳「活力無限大橋」2022年完工

將軍澳跨灣工程嘅位置 圖: 維基百科

新界各區嘅單車徑之中，將軍澳單車徑可以話較為獨特，佢並無同其他區連接，單車徑只係於區內穿梭。雖然係咁，將軍澳單車徑未來數年亦有重大發展，其中最令人期待係「活力無限大橋」。

「活力無限大橋」圖: 土木工程拓展署

大橋係「將軍澳跨灣連接路」工程嘅一部份。呢項工程目的係疏導將軍澳工業區及日出康城嘅交通，興建道路網以直達市區。工程主要分為兩部份，包括「將軍澳-藍田隧道」以及跨灣大橋，以減輕環保大道嘅交通負擔。整個工程已於2019年動工，預計2022年完工。

2020年7月嘅工程情況    圖:土木工程拓展署

圖片來源

網民實景航拍

活力無限大橋

「活力無限大橋」係將軍澳區內大型建設，屬「跨灣連接路」其中一段，工程預算達7.57億元。其中大橋於2009年開始徵集設計意見，最後採用「活力無限大橋」呢個設計方案。根據土木工程拓展署公開嘅資訊，大橋嘅設計有5個重點:

• 大橋全長約1.8公里，橫跨將軍澳海灣
• 橋面闊34.3米
• 設有雙程雙線行車道、3.5米闊嘅行人路及4米闊嘅單車徑
• 設有單車停泊設施
• 連接環澳路 (將軍澳86區) 至調景嶺寶順路

圖: 土木工程拓展署

土木工程拓展署話，大橋以「活力無限」為名，希望為當區居民帶來無限活力喎。其實大橋叫咩名未必有人在乎，只要橋上單車徑唔好有太多減速欄，又唔使成日落車推，相信一定會好受歡迎。

資料: 土木工程拓展署