Fitz > 運動 Sports > 健身 Fitness > [加州末日] 就係你呢個PK!
就係你呢個PK
PK Wong 王炳權

訃文出街幾天後,California Fitness便全線結業。本打算星期二參加女神在旺角的BC特別場,怎知星期二淩晨就宣佈『摺埋』。你條PK! 累我見不到女神。最扯火係成個記招不斷無限loop你是受害人,如果你肯定大隻仔呃了你條蝦條的話,理應報警。不是開記招、上壹仔跟大隻仔隔空互罵。整個記招,你條PK隻字沒有提到真 苦主如付了九十萬購買會藉和給了十五萬要女教練拉筋的會員的賠償事宜。睇到人想打爆個Mon.

我認識的會員又是不爭氣,不見十幾萬之後可以若無其事,拿拿淋畀幾萬入另一間gym做會員。有一間gym一天便簽了廿五萬約。據報導,California Fitness會員數目大概廿五萬,其中十萬是活躍會員,涉及預繳款項達十億。

發達容易,搵食艱難
十億! 咁好搵! 點會執笠呢? 今次不關成龍代言事。讀了信報高天祐的文章,我終於明白了。正正就是因為「太好賺」要執笠。

首先要分析香港gym的市場情況,有人相信這裏商機處處,人口雖多,但只有3%人擁有健身室會籍。但我偏向相信現時已有多間健身中心集團在香港立足 (還有連離島都有的康文署的gym),市場早已達至飽和,再沒有增長空間,且租金有升無跌下,根本不是一盤可持續生意。

其實當24 Hour Fitness2012年出售California Fitness全線業務時予NOVA INVESTMENTS ASIA LIMITED時,市場已見頂。24 Hour Fitness19962012年已吸盡目標客戶群,盤數當然靚但生意是沒有前景的。

既然無前景,唯一方法便是快快cap水,然後找另一個奧運火炬手。於是gym採用的經營模式如同國際學校或美容院,向消費者「一炮過」收取巨額預繳款項。問題是這筆數有幾多會用來支付每月開支如租金﹑員工薪金﹑水費﹑電費﹑燈油火蠟等等。

清盤庭上披露,California Fitness母公司去年及前年分別勁蝕逾3400萬及逾4300萬元,今年頭5個月亦蝕逾1400萬元,目前賬上只剩約1600萬元現金。狂吸客的錢去了那裡呢? 十億放係銀行,食息每年有幾千萬元,何解現今賬上只剩千多萬元現金?

另外,識睇數一定睇cash flow。『加記』每月帶來的現金流(cash flow)只是靠跟像陶傑一樣的永久會員及購買中長期會籍者。陶傑在接受訪問時談提到他每年只給八十八元 (應該是Infinity會藉),這麼細數目恐怕連毛巾數都找不到。

所謂逾10億元其實是sunk profit,這沉澱利潤早已在過去4年兩度賣盤其間被抽乾。

已故曹Sir講得好啱,「在香港,發達容易,搵食艱難」。

黑吃黑
財經作家渾水形容PK跟大隻仔這次董事爭權如黑吃黑,最終苦了十萬會員。其實大家都是同一類物種,沒有對錯,只有高低之分。各自找紙媒作關公戰,作為苦主的我當然有留意,就當警訊睇,正如阿Sir話,騙徒的手法是層出不窮的。如果我是PK,都會絕地反擊L咗佢。執之前,先轉移資產,之後再轉售給大佬,賣之前拖租拖糧拖數﹑訂器材唔找數。轉手後,貸款給大佬,隨即以最大債權人身份清大佬盤。業主﹑銀行、供應商﹑員工和會員通通都無仇報。

就係你呢個PK 2邊有白武士呀? 係香港
我們苦主之間期望有新買家接手,唯一聽到的是瘋之子同背後的金主。金主大有來頭,是殼后,財務知識和技巧是肯亞精英跑手級數。最攪笑是金主明明替瘋之子個場剪過綵,而且個仔做過個場的董事,依家話其實唔稔熟。猛人解釋她只做了一個CB (可換股債券)。猛人即是猛人! CB進可攻,退可守。

係香港,只有生意人,沒有慈善家。白武士? 算吧啦。

1加1等於多少
PK接手後的California Fitness已見笠水端倪?公司開始瘋狂劏客,攪到要消委會點名炮轟,所提供數據指2015年來自該公司的投訴個案較2013年及2014年上升30.4%及27.04%,達到296宗,佔2015年全港涉及健身中心投訴個案的51%。

開名後更變本加厲,今年首季繼續狂吸,單是今年1至3月的投訴個案已較2015年同期勁升29%,達到71宗,再迫使消委會開名「數臭」吸客賤招。

只有一個原因令PK不惜做臭個朵都要繼續瘋狂吸客。目的就是造靚盤數轉手賣盤或上市。轉手賣盤跟上市兩個options同樣吸引,當然上市後,更加可以魚肉小股東。Fall-back position 係自己清自己盤。

故事一則:
你問1加1等於多少?

  • 小學生:1加1等於2
  • 工程師(打開電腦寫程式):依照電腦程式計算的結果,1+1=2
  • 會計師:你想等如多少

Gym上市,只是另一個外賣仔cap水的1314故事。我唔buy囉。
本來健康的健身活動,就係畀呢啲PK攪到神憎鬼厭。

更多:
Fitz.hk Facebook專頁
你知道你是真.院友,當你……
我的十大電影、電視劇及紀錄片中的跑步男神
[院友話我們最幸福] 跑步幸福指數
[讀書包膠]《跑馬拉松絕對不能做的35件事》之一
Yiu Kwong Chan@Fitz.hk
Fitz Running 跑步


文章為作者意見,不代表Fitz立場。