[私人健身中心陷阱多] 康文署健身室至係王道?

開業30年的 TF Gym 突然結業，交咗月費嘅健身友血本無歸。而大型健身健身中心舒適堡 Physical，亦傳出更改健康舞班嘅使用方法，間接要買咗套票嘅客人再畀錢。呢一兩年間，呢一類大型私人健身中心不斷傳出有人中伏，咁愛好健身嘅朋友，又可以去邊到玩?

Facebook專頁 健身室 Secrets，有人發出一帖，力陳去政府康文署健身室嘅好處。

呢位朋友嘅說話重點係：

1. 康文署健身室設備齊全
2. 平日生活繁忙，都唔會成日去健身。join私人會籍一定會浪費

識睇一定睇留言，呢個帖一出，引來唔少人嘅反駁：

• 其實真係要睇你有咩要求啦，如果純粹想練大隻少少 fit 少少 (好似我咁)，康文其實真係夠了
  但如果你真係想做到好 pro 好 fit，咁出面啲 gym centre 一定齊架生啲嘅
• 問題係政府場，新既就好爆，舊既就好殘（不過一樣爆）
• 康文跑步機都要排隊呀，陰功……
• 康文唔係唔好，但都有佢缺點，成日比人霸機
• 報到名上嗰個三小時班先得㗎

上面嘅留言，某程度反映咗現實情況。就係康文署健身室嘅設備無論質同量，都難以同私人健身中心相比。而且要到康文署健身室，就先要參加三小時的「正確使用健身室設施簡介會」。呢個「簡介會」，一般人想工餘時間參加，係極難極難極難! (可參考《[七蚊健身不是夢] 康文署簡介會執雞攻略》)

政府新聞網圖片

附：康文署健身室的申請程序

1. 取得使用資格

• 參加康文署「正確使用健身室設施簡介會」，同埋測試合格；
• 參加康文署「器械健體訓練班」(2006年以後)，缺席率少過20%；
• 有康文署健體金卡持有人：
• 有認可相關資歷證明 (如各體育總會屬下嘅教練資格)
• 九大大專院校屬下嘅健身室使用證

貼士：一般市民最容易取得嘅資格，就係參加「正確使用健身室設施簡介會」。活動三個鐘，費用全免，大概每個星期喺各區體育館有堂。你 keep 住去康文署網站，留意新課程，鬥快報名就可以參加。(部份課程係抽簽，當然閒日下晝會無乜人爭啦。)

2. 健身室收費

• 月費：$180
  一個月內無限任用。當然唔會包毛巾，但亦唔會有私人教練氹你join Plan。
• 時租：$14 (平日下午6點前優惠價 $13)

康文署各間健身室資料 

新聞來源：香港01、蘋果日報