有日我去Training 嘅時候,咁啱偷聽到隔離有幾個人討論訓練嘅問題。其中有個,中學時體育老師就成日放羊(明嘅就明啦~),基本乜都冇學過;之後自己同朋友成日跑、做掌上壓,甚至間唔時去做吓 GYM。可以跑耐咗、遠咗,但係跑速冇進步過,力更加唔覺有進步過。

雖然未至於咁極端,但同樣情況,喺好多唔同運動員口中都聽過:練得唔少,又有做 GYM,但都係唔上力。

力量成長之道

好多人訓練概念好簡單:「跳得矮,所以要跳多啲;唔夠力,所以做多啲;唔夠快,所以郁快啲。」

並非話錯,不過絕對並非事實嘅全部,因為要取決於你“力量”以及”速度”間嘅平衡

首先,我哋要認識吓「力量-速度曲線」(Force-velocity Curve)。極籠統咁睇,力量以及速度會成反比關係:應用力量愈大,應用速度愈低,反之亦然。意思就好似幅圖咁,如果用例子嚟講:

  • 假設你最重可以舉起300磅,
  • 最快亦可以100m跑10s;
  • 但你唔可能用10s跑100m嗰陣舉著300磅。

假設訓練不變,力量與速度就會係曲線上嘅關係。但若果訓練項目分別為”速度”或者”力量”,條線就會移動:

  • 速度訓練:向右移,整體速度提升;但處於最高速度時,可應用力量不變
  • 力量訓練:向上移,整體力量,以及最高速度時應用力量提升,但速度不變

由於條曲線兩端,都會令對方無限趨向於不變,而好多時訓練嘅「樽頸位」,未必係因為Target Factor 未練夠,反而係其他缺乏練嘅Factors 限制 (Limiting Factor),例如:

你想再快啲,但又覺得喺樽頸,但現有狀態之下,除卻技術等問題,你嘅極限速度可能已經受限制;因為若果承受同樣體重(阻力),而你嘅肌肉力(e.g. 爆炸力、速耐)並冇進步,根據條曲線,你速度嘅進步會好少少少。

所以呢個時候,你就要將條curve 推向上(Strength Training) ,令到喺同樣速度下,你可以承受更高重量 (阻力),從而當你只承受體重時,就可以有更多進步空間畀速度。

大膽假設,小心計劃

其實當覺得出現樽頸(當然係一段長時間啦),重新思考 training plan 係一個不錯嘅選擇,因為無論根據 GAS Theory 定係 Force-velocity Curve,長期嘅表現不變,甚至乎下降,訓練計劃都可能出現咗問題。但一定要小心行事。

譬如你覺得速度到頂,想做力量訓練嚟改變條curve,根據SAID Principle,你就一定要 overload target muscles(即是做重訓);但又根據同樣理論,如果淨做重訓,我哋就會嘅進步就會局限於該重量及速度

所以其實唔係推高條 curve 咁簡單,而係要通過週期化訓練,令身體走完整條curve,最終達到大力啲、快啲。

Reference:

  1. G. Gregory Haff, N. Travis Triplett Essentials of Strength Training and Conditioning 4th Edition. Human Kinetics. 2016
  2.  Joyce, D. Lewindon. High-performance training for sports. Human Kinetics 2014

原文載於 Sportential 運動潛能資訊

Sportential 運動潛能資訊 Facebook 專頁


更多:
Fitz Facebook 專頁
[Sportential 運動潛能] 跑步IT人—膝外側痛(一)
[Sportential 運動潛能] 又係你? 肌纖—伸長又縮短 (下)
[Sportential 運動潛能] 又係你? 肌纖—伸長又縮短(上)
[Sportential 運動潛能] 跑項人注意 超速駕駛影響一生!
Fitz Life 生活


文章為作者意見,不代表Fitz立場。

歡迎投稿: http://fitz.hk/contribute/

Sportential 運動潛能資訊
Sportential 運動潛能資訊 - 我哋喺對香港運動醫學及科學界有說話嘅專業人員。於香港、澳洲、英國倫敦等地學習”體育教育”、”物理治療”、”運動醫學”、”體能訓練”。希望為香港,帶來最新、最快而又正確嘅檢查、訓練以及運動資訊。我哋每個都有不過經歷,但都流著運動嘅血! https://www.facebook.com/sportential/