美斯贏咗世界盃兼贏埋金球獎，球迷為之瘋狂。哥倫比亞一名 KOL 為慶祝美斯嘅成就，將「Messi」大大隻字紋上額頭，左邊臉紋上三粒星 (代表阿根廷三奪世界盃)，右邊臉紋 D10S (西班牙文嘅「上帝」)。
----- 廣告 Ad -----
原本佢以為呢個新形象會大受歡迎，點知喺IG分享後劣評如潮。佢最初仲死撐，話係個人選擇，各花入各眼，但係一個禮拜後終於轉口風:「我覺得好後悔，我希望時光可以倒流，抹走呢次不快經歷，仲抹走埋啲紋身。」至於佢會唔會植皮整容，就不得而知。
此外，日前亦有不明國籍嘅球迷，將美斯捧盃嘅圖像紋喺背脊。不過呢個美斯肥腫難分，睇怕難逃被恥笑厄運。
資料: Fox Sports、The Sun
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。