利申：以下是真實故事，所經歷一切係個別狀況，並非醫學解釋。文章目的是提醒大家，參與戶外活動必須要小心酷熱天氣。有關中暑及熱衰竭預防與治療，請參考專業醫療文章，或徵詢醫務人員意見。
起步初段，兩旁樹蔭，時有微風，相當怡人。
難得有一日喺閒日放假，人人返咗工，郊外一定水靜河飛，梗係上山享受難得嘅寧靜。
呢一日天色極好，萬里無雲，天空藍得有啲假。我搭上了82號綠色小巴，直奔城門水塘。
計劃係由城門水塘主壩，沿水塘綑邊而行2公里左右，上草山林道，然後逆走麥徑七段上針山，返回主壩。因為路徑熟悉，過往都在2個鐘內完成，所以只帶800ml食水，幾粒鹽糖，一條能量棒。
起步時氣溫約29度，初段水塘山徑，兩旁有樹蔭，時有微風，其實都幾舒服，仲可以跑幾步。亦知道山上太陽猛烈，呢一段專登少飲水，諗住留番啲水上山飲。
上針山暴曬
唔使一個鐘，邊行邊跑去到針山山腳，望住針山畀太陽曬住，自己已經成身濕晒，不過 feel 到狀態都唔錯，只係覺得有啲口乾。
----- 廣告 Ad -----
當時諗，一定係坐小巴前食嗰碗太興餐蛋麵啲味精太勁! 水唔飲住，食粒鹽糖先。
針山山腳，開始覺得熱，但又唔覺辛苦
知道天氣熱，已減慢速度一步步爬上針山，汗水無停過係咁流，面上嘅汗，用毛巾抹極都有。喺中途停咗兩三次之後，終於上到針山山頂。
原本想喺山頂稍作休息，不過太陽實在太猛，地面散發嘅熱氣亦令人相當難受，唯有飲啖水，慢慢落山。
水樽嘅800ml食水，而家得番一半。
水飲得好快，但都唔夠身上嘅體力消耗得快。而且雖然行得慢，不過心跳竟然 keep 住160左近，我開行 turbo 用5分披跑400米都未必會跳得咁快。
----- 廣告 Ad -----
體力好似突然被搾乾，越行越慢，越來越想停。呢個時候心裏盤算，如果停得太多，即係話要消耗更多食水，到時未必夠水落山。
落山時停下行下，開始有啲雲，但啲汗越爆越勁。
喺咁嘅情況之下，唯有放鬆身體，一步一步落呢1900級樓級，再慢慢飲埋嗰唔夠400ml嘅食水。
結果，前後用咗差唔多3個鐘行番去主壩，將剩番嗰一啖食水一飲而下! 再慢慢行去燒烤場公廁，開猛水喉凍水照頭淋，然後隊番支寶礦力，先叫做有力行番去小巴站返歸!
去到呢個石碑，個人先定番啲。
返到屋企仲大鑊!
返到屋企，沖完涼食完飯，以為休息一下就可以復原。點知雖然開行冷氣，但仍然不斷出汗，而且覺得心跳得有啲異常，坐低再企起身時亦有頭暈。我隨即拎老豆個血壓計量一量:
上壓 107，下壓65
因為家父患有高血壓，我平時有幫佢量血壓。所以我知道，我而家嘅血壓好低 (我平時下壓有80)。而持續嘅低血壓，係可引發缺血性中風!
而令我更擔心嘅，就係血壓計亦顯示我有心律不正。脈膊有時過100，有時得番70。
好彩我當年喺 St. John 讀過急救證書，呢兩年雖然無續牌。不過亦記得低血壓、心律不正，以及全身無力，係熱衰竭嘅徵狀。而治療熱衰竭，最重要係令身體降溫，以及補充水份及電解質。
咁樣，我就沖多次涼，開支寶礦力加冰。然後開多把風扇，瞓番一覺。
淺睡咗個零鐘之後，出汗少咗，頭暈嘅情況亦減輕，血壓亦開始回升。
由下晝兩點返到屋企，到晚上九點幾，唔舒服嘅感覺終於消失。
----- 廣告 Ad -----
血的教訓
我寫呢段經歷出嚟，只希望提醒大家，行山最緊要做好準備，唔好持熟賣熟。呢段路我差唔多一個月行一次，結果都會中伏。喺呢度再次提醒大家:
- 千祈唔好一個人行山。無論條路幾易，你有幾熟路都好，突發情況你未必可以預計到。
- 留意天氣情況。原來喺我上山之後，天文台發出咗酷熱天氣警告。我如果有留意，就唔會帶咁少水，亦唔會上針山。
- 注意食水同食物。真係唔好懶，預多少少水，以備不時之需。
- 能量飲品係必需品，單靠鹽糖等「口立濕」係唔夠。
- 要定時飲水、食嘢。當覺得口渴先飲水，已經太遲。
- 留意身體狀況。好似當我去到針山山腳，其實已經 feel 到出汗比平時多，嗰時應該檢討一下自己情況，唔應該踏上針山嘅石級，應該行回頭路慢慢走。
我知道教訓嘞，下次唔敢了!
編按：應作者要求，本文以匿名發表。
Fitz 連結: https://fitz.hk/?p=94595
更多：
Fitz Facebook專頁
[郁民教室] 向烈陽宣戰 提防中暑及熱衰竭
[郁民教室] 行山飲水基本知識
[郁民教室] 如何用Google Map規劃行山旅程
[郁民教室] 計算行山腳程 搵尼史密夫
