[前港督麥理浩爵士] 奠定香港郊野發展

麥理浩爵士，1917年10月16日－2000年5月27日

每次參加樂施毅行者，過咗針山之後，都會聽到人呻:「呢個麥理浩咩人嚟架，做乜咁衰起條麥理浩徑?!」2020年5月27日，係麥理浩逝世20周年，今時今日香港風雨飄搖，更令人懷念呢位帶領香港蛻變為國際大都會嘅領導人。

要數麥理浩對香港嘅貢獻，馨竹難書，隨口講都有一大堆: 成立ICAC、確立公共房屋政策、推行九年免費教育、推行中文教學、發展新界新市鎮、興建地鐵、建立完善交通網絡等。對大家喜愛郊野嘅朋友來講，更唔可以唔提佢嘅郊野政策。

訂立《郊野公園條例》

郊野公園概念，係源自英國。英國政府於1970年代根據《Countryside Act 1968》，陸續喺英格蘭及威爾斯設立郊野公園，既鼓勵市民享受郊野，亦保育郊野地區。麥理浩參考英國嘅做法，於1976年通過《郊野公園條例》，在公園興建設施以方便市民郊遊，亦防止過度開發鄉郊地區，保育生態及鄉村文化。

時至今日，郊野公園佔香港總面積40%，共32個郊野公園，17個特別地區、5個海岸公園，以及1個海岸保護區。

建立麥理浩徑

麥理浩徑喺1979年建立，最初係訓練英軍之用，而呢位港督亦喜愛行山，唔少路段佢都有行過。多年後有香港史專家推斷，因為當時中英關係好差，麥徑亦係軍事防線，防止中國共產黨進入侵香港。

時至今日，麥理浩徑亦係世上難得一見嘅山徑，佢既橫跨郊野同市區，亦穿過多座九龍新界嘅主要山脈: 由西貢嘅西灣山、雞公山、馬鞍山，至新界中九龍中嘅大老山、飛鵝山、獅子山、畢架山，最後就係令人聞風喪膽嘅針山草山大帽山。

因麥理浩徑嘅成功，之後幾位港督亦於港島及新界，設立多條長途行山徑，包括港島徑、衛奕信徑以及鳳凰徑。

興建萬宜水庫

1970年代，香港食水唯一來源係本地水塘 (當時無東江水)，興建萬宜水庫係為咗解決香港食水問題。萬宜水庫係一項巨大工程，興建水庫時要將西貢糧船灣和西貢半島東部之間的海峽以水壩圍繞，抽出灣內海水而成為水塘。水庫耗資超過13億，總容量達600億加侖，係香港儲水量最大水塘。

水庫建成之後，亦納入郊野公園範圍。而萬宜一帶嘅奇特地質結構，多年後亦晉身為地質公園，是西貢一個重要郊遊地點。

如果唔係受惠呢啲政策，相信50年後嘅今日，香港嘅郊野會變得面目全非。

資料: 維基百科