「究竟今日我地去邊?」然後喺一片吵鬧嘅尖叫中，不幸咁目送其中一位小編嘅 iphone 跌咗落地，然後懷著一顆「沉重」既心情，開始我哋呢個東平洲嘅半環島行。開始講前，提提大家7、8月正值炎熱天氣，加上咁猛太陽，話說當日天文台錄到溫度去到33度，真係要帶夠水同做足防曬啊!
講番先，成日都聽到人講東平洲係香港世界地質公園，咁究竟佢有咩巴閉嘅地方? 小編都做過下資料搜集嘅，根據資講呀，東平洲就係靠「三平一奇」見稱。「三平一奇」乜東東? 即係海平、島平、石平，而奇就係島上嘅頁岩，一片片堆砌而成，望落好似千層糕咁! 齋講無用，即刻開始行程啦!
嗱嗱! 完全體驗到「三平」中嘅其中一平! 海平。
點樣入去?
入去東平洲只係得翠華呢間船務公司有船搭入去，出發前記得留意船期啊！因為星期日嘅只係得一班來回船，之但係…上到船如果留心咁聽船員嘅 announcement 嘅話，就可以搭到加班船～搭唔搭好睇有冇聽到啦，因為係好突然咁講！講番正題，話說我哋星期日入去，小編2位就驚爆船無位，所以一早打去 book 定來回船飛～ 無錯! 船飛係可以預先 book 嘅，因為如果唔 book，就要有排等上船呀啦啦～今次不得不表揚下啲小編嘅「前瞻性」!
唔該上船前，請確保你電話呀、ipad 呀、switch 呀等等係有足夠電源，事關一程船都要1.5個鐘，仲耐過搭去澳門! 所以船上消閒娛樂點都要，今次我哋搭朝早9點船 (都係得果班啫～)，機緣巧合下識咗位東平洲地膽「老友記」，大家惺惺相惜兼打埋牙骹，佢仲教我哋點行、去邊飲涼茶添! 去埋個廁所整理好行裝，大概10點半左右，我哋就開始東平洲半環島! Let’s go!
----- 廣告 Ad -----
無論急唔急都好啦，記得係船上或者碼頭廁所搞掂好晒先，因為島上嘅流動廁所唔多!
另外，入東平洲真係全體驗冇網絡世界，全日係只會收到國內平台，就連小編兩個一開始迷迷地路嘅時候，想去士多話打個電話求救，點知比佢地就話「阿妹! 呢度打電話係漫遊呀～ 有得唔好打就唔好啦，收成幾十蚊! 好肉痛!」
翠華船務公司: http://www.traway.com.hk/ferry/
出發前除左睇船期，醒目最好 book 定來回船飛，話就話有加班船啫! 有時人多起上嚟，加班船都可能會爆。
當日無 book 到的話，就排隊等買飛上船!
----- 廣告 Ad -----
當日搭船果時，天氣好到加零一，藍天白雲!
個半鐘船程難免要自娛一番!
迷路知返半環之旅 GOGOGO!
路線圖 (來源: 香港旅遊發展局，按圖放大)
就落船果時，離遠就見到警察企咗喺度! 唔使驚嘅～ 唔講唔知，根據東平洲地膽「老友記」講，東平洲呢度得三個警察駐守，所以見到佢「迎接」我哋，感到光榮! 一落船，我哋就已向左邊第一個 check point (阿媽灣) 進發，以為好醒咁跟著石屎路咁行就無死，點知我哋二傻對著九曲十三彎嘅路，全完 get lost! 行到一段，上天都終於眷顧我哋兩小可憐，竟然比我哋撞見番「老友記」，好有神嘅指示，我哋踏回正軌向著阿媽灣進發。
喺阿媽灣沿岸有不少「千層糕」頁岩。
碼頭轉左，行一陣就會去到阿媽灣沙灘，沿途會見到唔少人係度浮潛、出海游水咁! 行咗無耐，就有人大叫「嘩! 點解呢啲石咁似千層糕嘅?」其實呢啲係石係被海浪侵蝕嘅頁岩，其實再沿海邊行會發現唔少其他風化嘅岩石、疊層石咁! 行一轉東平洲，地理知識真係增長唔少，但隨之然係「變咗炭」嘅肌膚!
我哋沿著海岸咁向前行，都見到唔少風化嘅岩、疊層石，總之好多「千層糕」啦! 一直咁行呀行呀，會見到唔少被沖上岸嘅珊瑚、貝殼，同埋礫石咁，記住唔好手多多拎走佢哋，因為喺地質公園入邊拎走任何嘢係犯法! 行咗大概半個鐘至45分鐘左右，就到咗第二個 check point (更樓石)，佢係東平洲東南角2座企係海邊嘅海蝕柱，好明顯因為似更樓而有呢個名堂啦!
影完相、打完卡之後，上番郊遊徑向前行，好彩沿路有樹蔭同埋足夠水，如果唔係咁猛太陽、又天氣咁熱，真係好易中暑! 大概半個鐘左右就到咗龍落水，天氣好到加零一，藍天白雲，吹住海風咁欣賞呢個香港最東邊嘅小島，不失為一個好好嘅放空路線。
龍落水之後，我哋就向著斬頸洲進發，都係一條條長長嘅樹蔭路，拯救咗 Daisy 呢位小編。話說喺更樓石果時，果度無遮無掩，曝曬咗一陣，開始有少少體力透支；當入樹蔭果時要即刻小休一陣先可以繼續出發，所以喺咁猛烈陽光底下，記得要走下啲陰涼地方唞唞，千祈唔好死頂! 行到咁上下就會見到指示牌，落個斜坡仔之後，就會見一望無際嘅海同埋「千層糕」(頁岩)，再轉一個靚彎，就見到「傳說中嘅」斬頸洲!
其實呢個斬頸洲本來係連住嘅山嘴，點解中間會斷開呢? 嗱! 拋書包時間：係因為風化侵蝕而斷開，先會有呢個天然走廊出嚟～行咗入去，就好似入咗武俠小說場景咁，係兩邊峭壁之間，難免要擺番個型甫士影下相打下卡。Yuki 仲話入到去好似「將冰山劈開」咁款!
----- 廣告 Ad -----
龍落水
斬頸洲
嚟到斬頸洲差唔多係行程尾聲，沿番山徑返去大塘村，果時差唔多下晝放飯時間，就去左士多「補充體力」。提提各位如果想喺士多沖番個涼先出番市區嘅，不妨可以放底15蚊，就可以享用士多提供嘅熱水沖涼服務，之不過兩小編唔係太建議，因為係要眾目睽睽之下咁同食客近距離沖涼! 沖定沖涼? 留番自己決定啦! 食完個靚飯，係士多 hea 下、吹下水，咁就返去東平洲碼頭搭番船出番文明嘅世界！而 Yuki 返出去搵 phone 神去救番部 iphone!
新昌士多咪以為細細間，但都有唔少中式套餐嘢食，當然唔少得海膽啦!
士多員工極力推介東平洲名物: 海膽炒飯
回程返去馬料水碼頭
注意小事項
就係呢張相救左我哋去程唔使排隊嘅預約船飛
- 記得留意渡輪船期時間表，如果驚多人上唔到船嘅，就好似我哋咁，打去船務公司預約定船飛，就包有位!
- 東平洲可以話係空曠嘅地方，無論夏天去冬天去又好，記得要做好防曬，如果唔係後果自負!
- 唔好睇少東平洲無咩斜路或者簡單郊遊路線，記得要著番合適嘅山鞋或運動鞋保護雙腳，因為東平洲有咬人嘅黑蟻，Yuki 沿途發現唔少黑蟻出沒，所以唔好貪同方便落海著涼鞋或者拖鞋。
*香港真係好靚，請各位行山郊遊，記得要做到 #自己垃圾自己帶走，愛護環境。
*切勿嘈喧巴閉掛住打卡，還要量力而為，郊遊又好行幾簡單嘅又好，都要記得著番對行山鞋先出發啦!
Fitz連結: https://fitz.hk/?p=102812
----- 廣告 Ad -----
更多:
Fitz Facebook專頁
[Plogging-夠Green沒有?] 跑著救山徑 下回再接再勵
[一期一會] 立山黑部阿爾卑斯路線 開山之美
電兔小玉@Fitz
