如果未能遇見神，就在毅行者去找吧 (下)

Law少許耀斌 2016-11-23

字 Decrease font size. 字 Reset font size. 字 Increase font size.

%e5%a6%82%e6%9e%9c%e6%9c%aa%e8%83%bd%e9%81%87%e8%a6%8b%e7%a5%9e-%e5%b0%b1%e5%9c%a8%e6%af%85%e8%a1%8c%e8%80%85%e5%8e%bb%e6%89%be%e5%90%a78 小琳隊 #0968 神行十二小時完成78910段。

第一，由城門水塘正式起行係晚上七點，當時已經行咗接近30小時，按比例要多15-20小時先可以完成餘下四十公里。

我吸收咗上年被洪松蔭帶領四小時完成9 10段嘅經驗，將佢延伸成四段路，目標係12小時完成，希望通完第二日頂，大家唔使俾太陽哂。

----- 廣告 Ad -----

當時各人狀態順序如下：

潘潘：點按都唔覺痛，係完全唔痛，基本上佢係咩構造都令人懷疑，可以行多一百公里
可誼：主要係ITB有反應，六十公里後算正常
小琳：全身乏力，摸到膝頭哥係震驚
BERNARD:基本上輕輕用手指篤兩邊大脾也經癲咗，按腳全程叫到收唔到聲

慶幸，唔算有不可挽回嘅傷勢

關鍵係，點樣將所有人嘅潛能都發揮。

分批上針山
針山已經喺前面，潘潘可誼係仲有得爆，由佢地快放，因為無路可以蕩失。而小琳比BERNARD更有力，要拉近兩組人嘅距離，

第一，要減磅，幫小琳同BERNARD尤其上坡揹背囊。
第二，俾佢地輪流帶頭，邊個有力邊個行先，我永遠典後。

效果好好，大家一口氣上到針山頂無抖過。

----- 廣告 Ad -----

不過最估唔到小琳喺大風下落針山要坐住咁落，唔緊要，用自己最舒服嘅方式，肯行就得。

唱盡上草山
草山相對順利，仲差D俾美食站FAKE到行錯路，好彩三分鐘後發現唔對路，呢段大家好精神，全程少林功夫加唱歌跳舞，到草山頂係大家緊貼。之後潘潘同可誼仲可以攤三分鐘，之後食埋麵三個鐘搞掂，抓緊時間食完就行，10點15起行上大霧山。

神行大帽山
我攞哂兩個背囊，跟住可誼同潘潘爆上山，由佢地喺後面慢慢上，因為我自己都要抖，爆完可以放低十幾磅。（再一次重申個袋以後唔好超過2KG、可惜唔安心水都裝2L)呢個時候前後五個人距離唔超過兩分鐘。

沿途同大家講，聽日七點就行完。（超過十二個鐘我都想死呀。）大帽山我地逢人過人，人龍中的火車頭，山野中的螢火蟲，一嗌小琳，小琳正正喺我後面，一嗌BERNARD，小琳又答佢喺後面。可誼亦喺適當時間食POWER JEL頂眼瞓，醒番。

大帽山，最後連搭膊頭拖BERNARD上大帽山呢招都出埋，我都爆爆地，拉BER上波唔容易，但神奇在喺一片迷霧同勁濕勁大風嘅石屎路上到波完全無停過，然後一口氣落山，仲有時間同可誼賽中檢討，痴線。

最後決定先落先休息，又一支箭落到底，夠半個鐘就趕佢地走，呢個時候重要的SUPPORT出現，有阿神同春燕送糖水同帶走背囊，有生哥帶可拎走嘅飯，有昌少再嚟陪行，是但無咁一樣都唔會做到目標。

而冠軍隊永遠唔會有機會面對嘅挑戰出現，通第二晚頂⋯⋯⋯⋯潘潘一到已經瞓咁，BERNARD係按到痛無得瞓，最正係小琳叫我按腳然後昏迷，然後可誼仲可以公關咁款介紹SUPPORT俾我識。

「哦，你就係LAW少⋯」

離魂第九段
再一次多謝昌少拎哂所嘢食，等佢地四個每人一支飲料（潘潘專稱）上路，仲擔任火車頭。薑係老嘅辣，講到頂眼瞓，可誼同潘潘已經係進入AUTO PILOT模式，搭住昌少膊頭喪行，真正係walking dead。其他人亦輪流上機。

到一段潘潘大叫「唔得啦我要瞓啦」，佢之前已經係飲醉三日咁款，之後講完壁啪瞓完，個頭差d撼落地，我嗱嗱聲墊個背囊俾佢，同時叫其他人行先。當時我預十分鐘俾佢快叉，正擔心自己都瞓著之際，我祈禱求主加精神力俾潘潘同隊友，潘潘就大叫「有嘢躝過我塊臉呀」，靜咗一靜，「佢又躝過我塊面呀，我唔瞓啦唔瞓啦」。然後就彈咗起身，一支箭標走咗，神奇。 %e5%a6%82%e6%9e%9c%e6%9c%aa%e8%83%bd%e9%81%87%e8%a6%8b%e7%a5%9e-%e5%b0%b1%e5%9c%a8%e6%af%85%e8%a1%8c%e8%80%85%e5%8e%bb%e6%89%be%e5%90%a722

----- 廣告 Ad -----

埃及奴隸式第十段
3個鐘就完成第九段，全程無停。到檢查站我連坐都唔俾佢地坐，因為當時屍橫遍野，所有人都係敵唔過愛睡魔而打算瞓多陣，橫掂都係四十幾個鐘完成。我玩過包尾，我知咩事，坐底咗有得抖瞓著咗，要再行就好難，唔想折磨自己，腳痛就係每佳嘅提神藥，幫到手。

唔夠五分鐘出發，水塘路窄我地決定當行山杖係拉繩，本來想靠哂昌少，一個拖兩個，結果太難就。

最終昌少拖BERNARD，可誼、潘潘，我拖小琳，訂立起碼要見到前面尾燈嘅見標，非常見效，呢班痴線佬仲跑得郁，潘潘見到我就好似爭我幾百萬咁，一見到我就跑。佢全程起碼見到我十次就嚟追到佢，而真正可憐嘅係小琳，我知道小琳都有軟弱嘅時間，可能想抖，想飲啖水，而我係真係埃及人起金字塔，除咗路面情況會提，全程就淨係講「我隻手抽住，小琳行快兩步」，呢段路超過一小時，佢一啖水無飲過，我個肚餓到打鼓，無力KICK腳不下五次回想全日唯一一餐正常係早餐。去到尾段一個落樓梯位，膝頭無力嘅小琳差D俾我拖到仆死（真實對白，我都有少少躁，扯到手痺），而佢會仆嘅原因係佢係無諗過要放開支杖，我諗番都好佩服佢，佢仲要係M到，柔弱而多情緒，但佢堅持而做到，係一D都唔容易。一停佢就問可唔可以俾水我飲，行咗成四十個鐘，剛剛一程無停過無水飲，真係好奴隸。 %e5%a6%82%e6%9e%9c%e6%9c%aa%e8%83%bd%e9%81%87%e8%a6%8b%e7%a5%9e-%e5%b0%b1%e5%9c%a8%e6%af%85%e8%a1%8c%e8%80%85%e5%8e%bb%e6%89%be%e5%90%a711 上到轉右嘅石屎路，我真心想死，佢地更加，但我地係最有希望嘅活死人。我當時好Q肚餓，好想食水果好想食水果好想食水果，但大家依然無停，一路上到路線確認處。

痴線架，有一箱橙呀，我問係咪食得，個人仲話隨便食免得拎，我人生無試過咁想食橙，感謝主，我喪開喪食，餵埋大家，太感動，我自己食咗兩個，佢地加埋食咗一個，我其實仲可以食多兩個架。

太正啦，神奇士橙。

天都光，然後一班痴咗總掣嘅人被昌少挑釁下開始跑，我都跑唔郁，而佢地尤其BERNARD對鐵腿已經豁出去，小琳落斜無再騰騰震，前面嗰我直頭有十五分鐘見唔到。

潘潘喺呢個時候仲話「哎呀，要同雷生（教會導師）講返唔到崇拜呀」 %e5%a6%82%e6%9e%9c%e6%9c%aa%e8%83%bd%e9%81%87%e8%a6%8b%e7%a5%9e-%e5%b0%b1%e5%9c%a8%e6%af%85%e8%a1%8c%e8%80%85%e5%8e%bb%e6%89%be%e5%90%a710