韓國毅行,遺下大會給我們的47公里,遺下衝過終點的興奮,遺下一片一世未必再看的風光⋯

但在做隊長上,卻上了很好的一課。

要數,做毅行的隊長隨便都可以數出十個條件:

  1. 有經驗所以更冷靜,咩事都可以扮到無事
  2. 要保持隊型,四個常在左右,互相幫忙
  3. 抓緊時間,應快就快,應慢就慢
  4. 要關心隊友,同時有實質行動
  5. 最好個人係幽默,因為痛同慘係只有幽點可以化解
  6. 要知道隊友嘅極限,並維持喺極限邊緣中,發揮最好表現
  7. 自己要甘心樂意,個人喜好擺開一邊
  8. 能力所及,盡量平衡負擔同速度,盡量達到一致
  9. 要尊重現實,但同時識得呃呃氹氹,令大家心理上距離縮短
  10. 要擺出最高理想,帶領大家享受磨練同痛苦

而最新學習的一課,是今次同三位二十多歲年輕人先強烈地感受的新法則:


「學做隊長,先要學放棄」

馬太福音23:11
「你們中間誰為大,誰就要做你們的用人」

起步前

做大佬就要服侍細,呢句有時只係睇到蝕底嗰面,而事實湊到越多人,能力就越高,返去自己嘅生活就越從容。

今次玩毅行:

  • 五日前:有人明明咳就出發前一日先睇醫生,
  • 兩日前:有人觀光時避開做攝石人又拗親腳
  • 一日前:有人千算萬算都算唔到大親戚突襲,痛足一日,又無食嘢乜滯
  • 進行中:有人開段已經磨損男人最痛(佢不斷堅持呢個唔係,只係大腿內側)

講呢d出嚟,唔係陳列失敗原因,而係決定上面關於極限嘅第6點嗰陣,自己心裡面諗嘅嘢,用我平常嘅速度,如果無受傷,相信已經無行唔哂嘅毅行,問題只係時間同埋辛苦程度。

「你們中間誰為大,誰就要做你們的用人」,十幾年前師公 oppa 何良俾我嘅第一個任務就係照顧人,行山嘅第一件事,唔係行完座山走人,係要照顧人,如果你能力好,點樣透過一段山路,將你嘅心力同身力去過俾身邊嗰個,點樣將你嘅淡定化解對方嘅擔心,點樣將你嘅積極去拉高佢嘅灰機,或者灰中有笑,通通都係學問。

但要帶領大家去放棄,仲難過帶大家去完成,呢個就係一個決定嘅重量,而做完決定之後,係要豁然開朗,唔係後悔莫及。

路程上,有好多想像究竟揹住大姨媽行山會有幾攰;究竟一個人開始眼瞓幾時會醒(出發前大家都係瞓咗兩、三個鐘),又準備通一晚頂;究竟個大腿內側有幾大,蟹行嘅姿勢可以維持幾耐…… 呢d想像都唔係憂慮,而係客觀地收集緊資料去判斷應唔應該行落去,PLAY AS A TEAM。

而我自己從來都無諗過要剪帶離場,因為自信能夠應付到最後,呢個係我性格傾向船到橋頭,亦都係毅行者原則,亦係獅子山嘅奮鬥精神,行到行唔到為止。但係 AS A TEAM 就要考慮四個人嘅極限,換著十年前嘅我能仲簡單,只要一味好任性咁話要行到尾就可以,但當時我俾幾個選擇俾大家包括

  1. CP5 走,連行李一齊拎
  2. 行多段,CP6 再決定,不過行唔哂都要返大會拎嘢
  3. 行到趕唔切 CP DEADLINE 為止

當大家為決定唔行喺 CP5 走而鬆一口氣,四人甚至八人攜手衝線嘅畫面已經留返喺另一個國度裡面。當另一隊香港朋友提出,「你仲想唔想行,想就 join 埋我地嘅時候」,真係好震撼。

究竟我有幾想一個人行落去?

我開頭答,你俾我諗諗……我跟住答,都係唔好啦。

事後反而俾我知道,我帶領大家放棄都係從容,要學習從容面對失敗,我唔需要用一條極難的毅行路徑去證明我自己,反而要俾隊友正面咁去面對呢次失敗。每個人究竟有無搏盡,不論判斷、體力同勇氣上都計,佢地自己會有答案。

毅行者嘅精神係俾食好住好嘅香港人去返最原始所需,然後探索自己嘅適應能力。而呢個失敗經驗都一樣,付出咗但未去到自己嘅110%,自然有機會後悔。

如果迫,可以迫到但有機會不歡而散,而我喺無水無糧之下亦無餘力去照顧其他人,所以返番去「人先係最重要」呢個大原則,決定係正確。唔好講到玩毅行天咁大,亦唔好睇少佢,重點係點樣應用喺日常生活入面。

千里迢迢嚟到韓國想完成100公里,無人會覺得我地係玩玩下,但幾軟弱幾堅毅都好,做隊長就係要面對失敗,面對放棄,面對「唔使講、得就得、唔得就唔得」呢啲其他人嘅想法,因為無玩嘅人重結果,玩緊嘅人重過程。

我回想我喺 CP4 至 CP5 嘅亭度休息,大家互相幫對方按摩,呢個已經係一個隊長最想見到嘅畫面,係好似一支膠水咁去連住一班人。令我今次呢個「唔得」係非常深刻同滿足。

哥林多後書 12:9-10
他對我說:「我的恩典夠你用的,因為我的能力是在人的軟弱上顯得完全。」所以,我更喜歡誇自己的軟弱,好叫基督的能力覆庇我。


誠邀參加韓國毅行嘅香港朋友一齊分享呢次毅行感受:

  • 日期:5月25日 (星期四)
  • 時間:晚上8時正
  • 地點:牛池灣銀池徑八號 二樓
  • 主題;韓國毅行經歷分享
  • 主辦:Free Foundation
  • 費用:免費入場 (歡迎公眾人士參加)

相信下年有得玩,會搞得更好,韓國山景係靚,想參加都可以嚟吖。

「獅子山」小隊籌款網頁:https://oxfamtrailwalker.or.kr/en/node/5252

有一班行山友叫「獅子山」Facebook 專頁

Law少 許耀斌 Facebook專頁

更多:
Fitz Facebook專頁
[有一班行山友叫獅子山] 史上最攞命的毅行者 (韓國毅行者2017)
[有一班行山友叫獅子山] 寫在韓國毅行六個鐘前…
[有一班行山友叫獅子山] 韓國毅行第一戰「敢死隊」
[出戰韓國毅行] 有一班行山友叫「獅子山」
[韓國首屆樂施毅行者] 踏上全羅南道 進入仙境 文化遺產之旅

其他文章:

文章為作者意見,不代表Fitz立場。

歡迎投稿: https://fitz.hk/contribute/

廣告