2019年3月16日夜晚,我喺逆走100終點前幾百米已經見到 support 咗一整日嘅三位,除咗chok手外,我用我僅餘嘅力向距地揮手,衝線一刻我諗自己永遠都唔會忘記,想像唔到自己竟然完成咗個人逆走100,重要 set 嘅目標全部達成 (成績容我係往後篇章先講),對三位 support 除咗心存感激,就係無限感激,終於覺得呢段時間既練習係無白費……

上左至右: 上司悟空恩、領域美人、絕對領域 (筆者)、CMW

回帶前小小到2016年嘅暑假,係我嘅上司悟空恩問我有冇興趣玩毅行者,重爭一個人先成團,目標慢啲18小時內完成,重要唔使錢,因為公司會岀哂全部。就係咁應承左悟空恩。雖然我都好開心受邀請玩,但心裏驚多過開心。因為其餘三人包括悟空恩都試過13個幾鐘完成,雖然佢話18個鐘內完成但我唔知咁算係快定慢,最慘係自己連半馬都未跑過,平時最多10K,依家一嚟就打大佬,就係咁我俾悟空恩推左落呢個深坑。

為毅行者作準備

第一次練習就已經係9月頭,原本嘅練習路線係麥徑1、2段,但去到浪茄,喺酷熱既天氣下,我哋決定衝落沙灘消下暑,因為太舒服,一浸就個幾鐘。最後,時間關係要原路折返,即係呢次嘅訓練,嚴格嚟講只係跑左北潭涌浪茄來回,所以訓練成果係接近零……

第二次練習,我哋用咗三個鐘完成第3段,往後嘅練習,其實都只係每段走過下,就係咁,係對每段所需時間毫無概念嘅情況下,就嚟到毅行者當日。

打大佬當日

重記得當日著左條長 tight,四人當中最弱嘅我諗住輸人都唔好輸裝備,點知跑到西壩已經覺得熱,隊友之一嘅百里駱駝仲已經除埋衫。因為我太慢嘅緣故,我全程都係最後,而悟空恩就喺不遠嘅距離睇住我。去到 CP1 西灣以為有得唞下,但都係因為我太慢,等到我黎已經嘟卡要走。雖然絕望但個陣狀態都覺得可以,所以就繼續走。如是者終於捱到去水浪窩,對腳已酸到唔屬於自己,邊行邊食野,已經要靠隊友同 support team 拖,個陣心諗重有60+km先到終點可以點算?

起步前合照,左至右: 絕對領域、悟空恩、超級隊長、百里駱駝 攝: Fuse Choy
西壩仲俾到反應嘅合照 攝: Daniel


往後路段都係以捱為主,藥膏都搽到無感覺,又想以自己能力完成,所以之後都冇點俾人拖。但代價就係對腳越來越酸,酸到逢落山都好痛苦。由於悟空恩後段慢左,去到 CP 9 我終於可以坐低,但呢一刻坐低起身呢一套動作對我雙腳黎講已經係一種負擔。過咗陣嘟左卡正當想繼續坐,support team 就講原來三位隊友已跑走……絕望之下唯有繼續頂落去,到 CP 9A 落山,每落一級樓梯對腳都酸到想喊,最終係呢個狀態下終於捱到番終點,時間係17:09:00。衝線後我即刻搵位坐低唞下,再望向三位隊友,佢哋臉上毫無疲態,心諗明明最年輕係我,三位40+歲既點解可以咁強! 但總括嚟講好開心,最起碼無因為自己而 meet 唔到目標時間,仲要做到有餘,發現原來真係有心我便成功。

衝線臉容扭曲一刻
全靠一眾 SUPPORTER 支持

後記

  • 最後對腳酸咗我足足一星期有多,每次坐低起身都好痛苦
  • 喺屋企磅重發覺輕咗十磅,成個星期狂食都未重番,覺得越野跑都好似幾減到磅,就係咁跌咗落呢個深坑
  • 同自己講,往後玩隊際唔梗要,但唔可以俾自己係最弱嗰個,實在太痛苦

(未完待續……)

Fitz連結: https://fitz.hk/?p=116282


更多:
Fitz Facebook專頁
[逆走100 Rebel Walker] 愛情 vs 100 km
[逆走100 Rebel Walker] 那些你追隨冒險的夢 我陪你去瘋
哭在逆走100km後
Fitz 行山 Hiking

其他文章:

文章為作者意見,不代表Fitz立場。

歡迎投稿: https://fitz.hk/contribute/

廣告
絕對領域
放工淨係識訓教同運動,終日無所事事既九十後,公司小職員,自2016年被上司推入越野界深坑後,閒時就上山親親大自然,再閒時就玩下比賽測試下自己。 可能未必有人想知,但都想同大家分享下我既山記,同時紀錄低話哂自己都叫年輕過。