[唔止怪獸家長] 怕羞草以外之奇怪投訴

大棠郊野公園

《都市日報》日前報道，幾年前有家長同佢嘅寶貝，去到大棠郊野公園玩，佢小朋友就畀怕羞草拮親，結果向管理公園嘅漁護署投訴。漁護署順應家長意見，將嗰堆怕羞草移稙到另一地方，並用圍欄欄住。

最近，當區區議員發現呢一堆怕羞草死得七七八八，質疑當局只係為息事寧人，妄顧植物嘅生長。

而署方話，佢哋會喺適當季節，再培植唔同嘅植物，供市民觀賞。

其實自從山友喺屯門徑附近山徑發現膠墊之後，對於政府當局「無嗰樣整嗰樣」嘅行徑，已經見怪不怪。有人總括呢件事，話「漁護署低能，投訴嘅家長更低能！」

濕地公園嘅怕羞草，生長得相當茂盛。

我有位做物業管理嘅老友，對呢類投訴就話見怪不怪。佢講咗幾個經典嘅投訴Case畀我知：

1. 有住客話佢屋企對面棵大樹，住咗隻叫得好大聲嘅雀仔，朝朝天光四五點就大聲唱歌，嘈住佢瞓覺。要求管理處幫佢趕走隻雀。
2. 停車場有幾棵杧果樹，有車主驚杧果熟咗跌落嚟，會整花佢部車，叫管理斬
   咗啲杧果樹。
3. 住客話屋苑草地惹蚊，叫管理處改舖石屎。
4. 露天泳池冬天封閉，會放水清洗。有住客話影響風水，要求冬天都要開放泳池。

我朋友就話，呢啲投訴簡直磬竹難書，多到講都講唔晒！而佢採取嘅做法，就係拎晒去業主會上面傾，用群眾壓力令投訴人心息。

不過漁護署連呢一步都唔做，諗都唔諗就移走「拮人」嘅怕羞草，係咪判斷有問題呢？

更多：
Fitz.hk Facebook專頁
[拒絕郊野石屎化] 專訪曾小強：希望更多人關心香港郊野
[膠嘢公園] 曾小強：郊野石屎化的5大問題
[山友傳奇] 鵬哥失踪兩日的奇幻之旅
[郊野石屎化] 你揀木櫈定石屎櫈?[行山友剋星] 石屎山徑一條都嫌多
Fitz Hiking 行山