----- 廣告 Ad -----
![](https://i0.wp.com/fitz.hk/wp-content/uploads/2017/07/獅子山精神隊-毅行開操-在西貢37度的一天出發之十八死士_03.jpg?resize=696%2C522&ssl=1)
獅子山精神隊(左起): 康復者Raymond、Jacky,精神科醫生黃宗顯 Willy、Law少 許耀斌(作者)
無死,十八個都平安無事,我地有時熱血起上嚟真係自己都驚。寫緊呢幾行字嘅時候,係需要擘大隻腳,因為今日出鹽真係好勁,男人又最痛,毅行路上試過蟹行嘅男士應該明白⋯
但好想講一句多謝牛耳石山,因為你嘅焗熱無風令我地互相扶持,多謝雞公山,因為你嘅上極未完,令我地突破自己。十八人能夠一齊行山,不容易呀,當中有獅子山精神隊齊 team,潘潘隊齊 team,仲有商台舊同事,教會弟兄,第二次見面嘅傳媒朋友 Christy,同第一次見面嘅網友 David。
年齡介乎20-60歲。
----- 廣告 Ad -----
好快,喺牛耳山已經分開咗兩班人,因為黃醫生 Willy 好耐無運動,六呎四高嘅 Raymond 二百幾磅上山,真係唔容易。不過好快睇到山上兩代人,自自然然墮後嘅全部都係商台舊同事,喺麥徑都留低過唔少腳毛,呢班人好神奇地三兩個包一個,逗住逗住最需要陪嘅人,係好自然。呢班人唔急唔趕,正面又識照顧同鼓勵人。
如果你想成為一個更好嘅人,你同人一齊嚟牛耳石山行吓,我記憶中我喺呢段俾唔少人鼓勵過,亦都鼓勵/昆/氹/呃/欺騙/迫唔少人上呢段長度得500m嘅山。而年輕人一定要繼續衝,唔好留爆盡佢,十年前嘅我都係唔識等,唔鐘意等。有時都懷念同商台神剪綠之稱嘅舊隊友,臨上到頂鬥快爆一段嘅白癡往事。
奇妙。
----- 廣告 Ad -----
傾計嘅時候,提到為父嘅心同媽媽嘅心,我話我最多係做到為父嘅心,就係行過見到醒起記得咁就買埋兩抽提子上路,但媽媽嘅心係星期五已經買定星期六放雪櫃前一晚放冰格,等大家都有冰葡萄食,係呀,想大家辛苦得嚟舒服,意志消沉得嚟有驚喜,呢個心仲培養緊。
所以更加要多謝嶂上許生,喺山上竟然可以有凍紫貝天葵、豆花、各式各樣飲品,真心唔敢想像你d飲品點托上嚟,雖然聽過你成部雪櫃都係咁托上嚟,香港始終有你。
一班人行山著重過程,如果太慢,意志消沉;如果太快,會錯過太多風景,上到雞公嶺,同willy都驚嘆個日落喺朦朧間所發出嘅光芒。然後衝落山黃醫生仲要衝去尖沙咀睇一個症,相信佢今晚認識到身心俱疲。
我期待 Christy 第日行毅行多過佢篇報導,我睇潘潘隊大合照,望著呢班新相識,我覺得好奇妙,我回想商台呢班兄弟姊妹,我慶幸自己工作中賺到友情。
補上多位七月山友生日祝福,綠嫂抱多個孫,何良 Dora 生快生快,何亨「心想事成」。
山上見。
David 第二次見面再同你傾。
![](https://i0.wp.com/fitz.hk/wp-content/uploads/2017/07/%E7%8D%85%E5%AD%90%E5%B1%B1%E7%B2%BE%E7%A5%9E%E9%9A%8AR_logo-1024x668.jpg?resize=696%2C454&ssl=1)
Fitz 樂施毅行者
每年樂毅施行者,Fitz 都會組織一支隊伍,目的不是要挑戰時間,而是希望承傳毅行精神。今年我們以 Law少 帶領一支由精神康復者及精神科醫生組成的隊伍,期望可令市民對精神病有更正確的認識。
----- 廣告 Ad -----
更多:
Fitz Facebook專頁
[樂施毅行者2017] Fitz x 獅子山精神隊
Fitz Hiking 行山