剪帶的理由f上次我山雞講過,對於毅行者嚟講,「退出嘅決定會更令你一生遺憾……」。收到有網友嘅回應,大意話退出呢件事唔使太執著,今次衰咗,都仲有大把機會重頭嚟過。

對於呢個睇法,我山雞非常贊同,古語有云:「留得青山在,那怕無柴燒?」體力不支、遇上意外,甚至準備不周等等理由,都算係一個合理嘅退出理由。不過,對於大多數人嚟講,能夠參與毅行者活動,可以說經歷過千辛萬苦,由報名抽簽、幾個月嚟嘅訓練準備,甚至生活作息嘅改變、家庭生活嘅重整等等。付出咗咁多,如果單單一個微不足道理由而放棄,就真係覺得太唔值得嘞!

蔡東豪2011年剪帶,有唔少支持者相當失望。
蔡東豪(左) 2011年剪帶,有唔少支持者相當失望。

由參加毅行者感受到人生道理嘅蔡東豪,就話:「剪帶是毅行者極刑。」可惜佢喺2011年,由於大雨、大雨、大雨,最後因為佢囝囝一個眼神,就決定「懷著感恩剪帶」。當時,有蔡東豪fan屎對於佢嘅決定極度失望,仲話要火燒屋企本《毅行出哲學》。嚴重程度比起舊年蔡東豪因為誤判而停辦主場新聞,實在不遑多讓。

參加咗咁多年毅行者,年年都聽到一堆各式各樣嘅剪帶理由。以下係幾個比較特別嘅原因:

  1. 同蔡東豪一樣,都係喺2011年遇上大雨,A君喺雞公山腳楁北走廊退出。佢話對鞋濕晒,覺得好唔舒服,覺得自己行唔落去喎。而佢同人講退出理由係因為唔記得著Gor-tex鞋!(當年咁大雨,著乜都無用。)
  2. 有一位計劃以18小時完成的「準」超級毅行者,喺第二段北潭凹宣佈退出。佢發現到Checkpoint嘅時間,比佢計劃嘅差咗45分鐘,覺得自己唔可達到預計成績,決定退出。(據講佢嘅隊友之後同佢斷絕來往)
  3. 有人為咗參加毅行者,向公司攞兩日大假,仲要做定放假時嘅工作。結果,臨起步前一刻佢先完成工作。佢喺廿幾個鐘無瞓過之下,行到去水浪窩,抵受唔到睡魔襲擊,剪帶收場。
  4. 我覺得呢個case最悲慘:一位物業管理嘅主管級人員,行咗成廿個鐘後,收到公司電話,話屋邨有多位保安員同時請假,唔夠人開工,畀老闆急call返去頂更。結果佢喊住口由畢架山直奔黃大山坐地鐵返工。(事後,隊友及支援朋友質疑佢老闆係咪咁大影響力……)

我山雞就覺得剪帶純綷係個人決定,外人唔應該批評。當然,我亦唔係蔡東豪,我唔可以將毅行者提升至哲學,甚至靈性層次。我只能講,毅行者唔單只講求體能同行山嘅技巧,仲考驗做人處事,以至人與人之間相處嘅能力。

毅行者嘅艱苦,外人難以明白。剪帶嘅決定,旁人其實唔應該阿芝阿佐。
毅行者嘅艱苦,外人難以明白。剪帶嘅決定,旁人其實唔應該阿芝阿佐。

毅行.傳承
Fitz.hk為樂施毅行者2016大會媒體伙伴

更多:
Fitz.hk Facebook專頁
[毅行備戰] 系列
山雞@Fitz.hk
Fitz Hiking 行山

廣告
山雞
十歲登上魔鬼山,二十歲游走大帽大東鳳凰釣魚翁大刀屻。志願有二:生個仔要叫阿山;登上喜馬拉雅山,掛上真普選直幡。