行山遇雷劈 | 保命密碼30/30

上個周末天氣突然風雲色變，落大雨打晒雷，有行山友就一個唔好彩受到雷擊，受傷送院。

戶外活動嘅安全守則，第一條肯肯定係：留意天氣情況。無論係出發前，或者係出發後，都要不斷mon住天氣情況。

其實喺外國，就有一個叫做「30/30守則」(30/30 Rule)。就用嚟判斷雷電係咪有危險：

1. 見到閃電後，如果少於30秒聽到雷聲，就代表有危險，要做足安全措施：蹲下，雙手放頭。
2. 睇唔到閃電，只係聽到雷聲，或閃電同雷聲嘅時間多於30秒，代表暫時安全。可迅速逃去較為安全地方，如低地、建築物。
3. 最後一個雷聲過咗超過30分鐘，再無行雷閃電，而天氣亦有跡象好轉（如天變亮、風漸細），可離開暫避之處。
4. 30/30守則只供參考。如果一大班人，或天氣突變，就要因時制宜。

安全措施：蹲下，雙手放頭。

1. 附近有建築物就去嗰度匿埋，就算關咗門嘅建築物，入唔到去都可以喺出面匿
2. 離開山頂或高處，盡量往下走
3. 雷電會找尋最高地方傳電，所以附近如有樹木或電纜，要立即離開
4. 遠離金屬物體，如鐵欄、天線、水管等金屬物體。身上有頸鍊、手飾亦要脫下
5. 電流會沿導電體傳到地面。若地面有水（雷電大多數會有雨），千祈唔好訓或坐喺地下。身體蹲下，雙手抱頭
6. 如在空曠地方，身體盡量踎低，並將身上嘅金屬物品除低
7. 熄電話 (呢個未必有科學根據，但寧可信其有。況且，check少陣WhatsApp唔得咩？）
8. 喺海上或河流，第一時間上岸

最後緊記，天氣情況多變，要不時留意天色，或者天文台網頁。

資料來源：lightningman.com.au、漁護處