毅行者啱啱過左一日，好多畫面仲係腦袋裡飄浮，好多謝這兩天給我遇到的人。
好多謝每位的士哥哥，關心比賽嘅近況。第一日，知道我趕時間，特登車我去最近嘅地鐵站，原本可以賺幾百蚊，最後竟然同我講一句：「你哋咁努力支持隊友我仲邊好意思收你錢。」
知道我準備 support 陪行，特登係落車嘅時候俾咗包芒果乾我，叫我小心天氣加油!
喺大帽山去元朗大棠嘅時候，有司機竟然會擔心，太夜冇車出返市區，專登俾咗自己嘅電話，叫我走得嘅時候會搵啲兄弟車我返出嚟。好多謝遇到你地，我先能夠準時去到每一個 CP 位置守候。
第一次以攝影師嘅身份去為隊友 support 影相，發現其實香港仲有好多值得我們支持，仲有好多愛喺裏面。
當我睇返相嘅時候，每一張相片都仲歷歷在目，每一張相片都有佢哋嘅故仔，見到快隊為自己成績衝PB時間而努力；見到好多參賽者頂唔順炎熱天氣，喺 CP2 北潭坳有中暑現象，被迫放棄；係CP4因為肌肉疲勞，接受治療；喺CP8荃錦坳無盡嘅落斜，好多參賽者已經瞌埋眼，憑着感覺，走以後嘅路。
好多謝路上記得我嘅每一位，當影影吓相，突然傳來一句：「咦！師兄又係你呀，啱啱喺雞公山先見完。」
大帽山嘅時候：「師兄辛苦你啦，今朝城門影完又見到你！轉頭你又會去邊啊。」
大棠嘅時候：「終點都見到你，唔好影相啦，我哋自拍張啦!」
作為一個攝影師，最開心嘅就係可以用相片，記錄下來作為你地的回憶，見到你哋為咗最佳嘅表現上鏡，用盡力去笑，去跑。辛苦你地啦，一切都做得好好，Good Job。
>
多謝路上遇到每一位嘅人，下年再見。
所有圖片來自作者威濂臣
威濂臣 William IG: https://www.instagram.com/williamlwl_/
更多：
Fitz Facebook專頁
毅行者的魔力
[樂施毅行者] Support Team 支援點攻略
[樂施毅行者] 毅行隊伍的「第5人」
Fitz 行山 Hiking
一個鍾情於山嘅男孩 行山、露營、攝影無所不談 溝通能力極差，喜歡用相片帶你融入其中。https://www.instagram.com/williamlwl_/
