呢幾日時晴時雨，大帽山呢座全港高最峰，「白果」不再，間中都有雲海睇下。荃灣某酒店就乘勢推出「遊山食宿計劃」，等大家可以舒舒服服由酒店出發，上大帽山一遊。
套餐價每位成人$598，仲可以享用酒店設施 (好似得健身室)，計劃包括:
- 自助早餐
- 外帶小食盒連飲品 (行山用)
- 秋冬滋補養生宴 (行完山進補)
- 雙人/三人豪華客房 (一晚)
- 成人免費享用迎賓飲料
- 大帽山遠足建議路線乙份
- 訂購兩間客房或以上可獲贈單程的士(四座位)接送服務 (由酒店至大帽山扶輪公園)
呢個價錢抵唔抵，確實見仁見智。你話四個人加埋成二千幾蚊，就算屋企喺香港仔，搭的士去大帽山最多都係 $500，剩番 $1500，四個人好豪氣食乜都得。不過，如果約到三五知己住下酒店玩兩日，呢啲開心時刻又唔係用錢可以衡量嘅。
最大問題係，如果一心一意諗住上大帽山睇雲海，呢啲大自然現象又唔係可以用錢解決得到。到時畀咗錢住酒店，上到山結果只睇到張「A4紙」，大霧到乜都睇唔到，唔知會唔會呻笨呢?
----- 廣告 Ad -----
不過，無論係咪住酒店，上大帽山睇雲海，都有幾件事要留意:
- 留意天氣狀況，參考《上山睇雲海 4大指標》
- 就算酒店送你搭的士，汽車都只係去到山腳。要上到山頂一般人要行一個鐘左右，所以要有基本體能
- 酒店送嘅「遠足路線」唔知有幾詳細，不宜盡信。任何戶外活動都要做足準備，出發前先了解路線，以及準備充足糧水及裝備。
朱溫
生於亂世，有種責任。這個責任就是做好自己，感染別人。鍛練好身體，才能裝備自己，迎接亂世。