呢位係戴祖儀
兩位大台藝員馮盈盈、戴祖儀，報稱早前同公園夾竹桃合照後，雙雙出現頭暈作嘔症狀。新聞出街後，有關屋苑夾竹桃樹已被鏟走。有專家指，夾竹桃毒性好強，連花粉同花蜜都有毒，所以大家唔好亂摸。
首先令我山雞疑惑嘅係，夾竹桃有毒，小學常識都有教，再加上舊式公共屋邨公園都好鍾意種夾竹桃，我哋「屋邨仔」見慣見熟，知道有毒都唔會立亂摸。呢啲係生活常識，咁都唔識我覺得真係好奇怪。
不過，呢單新聞最大嘅價值，唔係話畀大家知夾竹桃有毒，而係提醒大家一個好基本嘅行山常識: 唔熟識嘅植物咪亂搞。
台灣人好鍾意上陽明山摘野生海芋花
行山最忌手多多
其實「咪多手」呢句勸喻，最常聽到係阿媽教仔，正常小朋友先至會手多多。不過唔知點解，行山時好多年紀有番咁上下嘅朋友，或者佢哋鄉下有啲務農經驗，就自問對郊野動植物好有認識，於是就會摘吓花模吓葉，再抆下啲草，甚至將果實放入口。
----- 廣告 Ad -----
好彩嘅話，最多只係被刺拮親，如果立亂嚟又碰到有毒植物，後果真係唔敢諗。就以夾竹桃為例，樹枝嘅汁液如果觸及有傷口嘅皮膚，嚴重嘅可以中毒身亡。醫管局資料有個案例，話日本有人用夾竹桃沖水飲用自殺，30分鐘已出現狀況，一日之後毒發身亡!
所以，無論行山以致行公園，對待植物謹記:
唔熟悉嘅植物，唔好掂、唔好模、唔好摘、唔好直接聞，更加唔好放入口
5種常見有毒植物
舊年醫管局推出《香港有毒植物鑑》，羅列香港常見有毒植物，大家得閒可以研究下，對行山安全其實好有幫助。專家話香港最常見有呢五種有毒植物:
- 繡球花: 汁液有毒，接觸後可令皮膚過敏，進食會有噁心、嘔吐、腹瀉或腹痛
- 紅杜鵑: 整棵有毒，葉及花毒性較
- 含羞草: 整棵有毒，但暫時無人類中毒個案
- 銀杏: 銀杏的種子，未成熟及未烹煮時毒性較大。市面出售的銀杏已經過處理，不用擔心
- 牽牛花: 整棵有毒，種子毒性較大
----- 廣告 Ad -----
山雞
十歲登上魔鬼山，二十歲游走大帽大東鳳凰釣魚翁大刀屻。志願有二：生個仔要叫阿山；登上喜馬拉雅山，掛上真普選直幡。