Fitz > 運動 Sports > 行山 Hiking > 山徑垃圾嚇死人 是誰令香港人瘋癲?

文章《[康復香港] 一窩蜂行山 比疫症更可怕》發表之後,迴響甚大,當日下晝收到傳來嘅圖片。

相片拍攝地點係赤柱軍營入口山徑,垃圾堆入面有紙巾紙碟紙巾,有廚餘有食物包裝,最令耐人尋味就係有隻行山鞋同埋一把雨遮。

拍攝者話,山徑側邊係燒烤場,除行山人士外,亦有可能係燒烤人士留低。

呢堆垃圾好誇張? 2016年聖誕節,有人喺大帽山山頂執到十幾公斤垃圾,然後抬落山,再拍底呢條片,怒X一眾喺郊外亂拋垃圾嘅垃圾:

呢條片嘅重點係,「我嚴重警告所有唔識回收同處理自己垃圾嘅人咪撚再行山露營扮親親大自然」。今時今日,應該可改為:

「我嚴重警告所有唔識回收同處理自己垃圾嘅人咪撚再行山露營抗疫變放毒!」

瘋癲的行山文化

2016年聖誕距離今日,都係3年多少少,但香港人呢啲行山文化一直無改過。咁多年嚟每逢行山旺季,唔係有大量垃圾遺留山野,就係有人不自量力挑戰危險山徑,要救援人員犯險上山救人,亦有人刻意破壞山野設施,破壞樹木。每年大東山爛頭營,都有人爬上屋頂;荔枝窩的榕樹氣根,黃竹角咀嘅鬼手石,已被破壞得不似物形!

我山雞亦不下一次讉責呢啲行為,係香港人唔鍾意山野但又要上山? 定係香港人真係太無公德心,鬧極都唔入耳?

行山時,請記住……

呢一刻,暫且唔討論呢個問題住。既然最近又多咗人行山,我哋再次提醒大家,為咗保護我哋碎弱嘅郊野,以及保護自己,大家行山時請記住呢10件事:

1. 計劃行程,衡量自己及團友嘅能力

最好規劃詳細嘅路線,包括: 起點、終點、中途補給等。如果做唔到,至少都去 Fitz 或 漁護署,參考提供嘅路線。

2. 補給及裝備

帶水、帶糧食、帶地圖、帶電筒 (唔好諗住用手機電筒,會唔夠電)。衣著要輕便。

3. 不要棄置任何垃圾

郊野公園山徑不設任何垃圾桶,大家一定要拎啲垃圾落山。就算有垃圾桶都好,最好亦將垃圾拎出市區棄置,山徑垃圾要由清潔工抬落山,大家顧己及人行多步啦。

4. 請勿喧嘩

始終郊外地方都幾寧靜,太大聲講嘢好易騷擾到其他人。

5. 勿破壞大自然

山徑樹木、花草,不要破壞。整爛咗其他人咪欣賞唔到囉。

6. 注意禮儀

迎面遇到其他行山客,最好講句早晨、午安 (唔講都唔係罪嘅)。記住山徑狹窄,請禮讓,要休息嘅話最好搵個空曠地方,以免阻塞交通。

7. 留意天氣

無論起行前定係行山期間,都要留意天氣變化。並且因應天氣情況,帶備合適裝備,例如防水風褸、雨傘等。

8. 遇意外,要冷靜

遇到有人受傷,或團隊迷路,先集合全隊隊員,不要試圖自己找路求生。先嘗試致電999,依從救援人員指示,並於意外位置守候。(見《[最緊要定] 行山迷路13項自救辦法》)

9. 小心火種

雖則話郊遊公園範圍唔可胡亂生火,但有無人執法係一件事,自己有無公德係另一個問題。

10. 出行前,先報告

將目的地、路線等資料 (越詳細越好) 講畀一位無隨團行山嘅親友知,或者使用漁護署「郊野樂行」流動應用程式,程式附有GPS 遠足留蹤服務,或使用「50222遠足短訊留蹤」。

延伸閱讀: [顧己及人] 山野遠足安全常識


文章為作者意見,不代表Fitz立場。